Shillong, Jymmang 17:
Ka Khun Hynñiewtrep National Awakening Movement (KHNAM) ka la rai ban pynlong ïa ka General Council ha ka 3 tarik Jylliew.
U General Secretary ka KHNAM, u Bah F. Marpna u la ong ba ka General Council kan long ha Diman Hall, Jaïaw Pdeng (hajan Madan Student) naduh ka por 1 baje nohphai sngi.
Ha kane ka sngi ka KHNAM kan pynskhem ruh ïa ki nongkitkam ba thymmai jong ka Central Executive Committee na ka bynta u snem 2023-26.
Shuh shuh ka KHNAM kan sa ïatai ruh ïa ki mat kiba kongsan jong ka seng ryngkat bad kiwei pat ki prokram ba la pynkhreh. Kumta ka KHNAM ka la kyntu ïa ki dkhot baroh jong ka seng ban poi khnang khnang ha katei ka sngi sha ka General Council.
