
Shillong, Jymmang 17:
U President ba rangbah ka Voice of the People Party (VPP), Bah Ardent Miller Basaïawmoit ha ka Sngi Balang u la ong ba lada ka seng ka wan ha ka bor, kan khyllie lut ïa ka kam tuh kam thiem kaba la don baroh shi katta.
U Bah Basaïawmoit u la ong ïa katei haba ai jingkren ha ka jingïakhih shong kyllaiñ mungor kaba la pynlong da ka seng ha ka Sngi Balang.
“Ka don ka jingmyntoi haba phi ïoh ban shong ha ka bor, phi ïohi jia aïu ha kine ki khyndiat sngi, ka Executive Committee (EC) ka KHADC kaba ïalam da u Bah Titosstarwell Chyne, ka shong, ka khyllie ïa ka ‘file’ naduh u snem 2014, bad haba ki lap ha kata ka snem ba ka don kata ka jingïa ot bad jingïapynbeit ïa kaba nga la dep ban batai…ngi ruh lada ngi ïoh lad ban shong hangne (da kaba kdew kti sha Secretariat), ngin khyllie ïa ka jingïatuh ïathiem kaba la ïatuh baroh shi katta,” la ong utei u nongïalam.
Kumta u la kyrpad ïa ki paidbah ban duwai khnang ban ïohi ïa kaba kum kata ka sngi.
“Ynda ngi don hangtei, phin sa ïohi haduh katno kine ki la lute ïa ka ri jong ngi, phin sa ïohi haduh katno kine ki la leh shiliang bad pynlong ïa ka ri jong ngi ba kan duk kan kyrduh,” la ong u Bah Basaïawmoit.
Haba phah khubor sha kito kiba don ka jingsngew ba ka VPP ka thmu tang ban pynbiej ban pynkhlaiñ ïa ka seng, u President u la kubur ba ka don beit ka jingkwah ban pynkhlaiñ ïa ka seng tangba kam dei pat da ka lynti jong ka jingpynbiej ne da kaba ai kyiad, ai pisa ne da kaba shu ai kam kontrak.
“Ka seng kan khlaiñ hynrei ym da ki jingpynthame, ym da kaba shu ai kam kontrak ïa ki nongbud…em, kum kata kan ym treikam. Hynrei kine mynta, ym ba ki pynkhlaiñ, hynrei ki teh mraw ïa ki nongbud jong ki…ngi ngim kwah ban teh mraw ïa u paidbah, ngi kwah ba u paidbah un long kynrad ïa la ka jong ka jingim bad un rai hi ma u ïa ka lawei ka jingim. Ym dei ban shu bud tdong ïa ngi tangba tieng ïoh duh kam kontrak,” la ong utei u nongmihkhmat.
Haba kyrpad ïa ki paidbah ba kin ym pynsngap ïa ki khana hamsaïa shaphang ki nongïalam, u Bah Basaïawmoit u la ong ba kam don kano-kano ka jingïapher jingmut bad ki nongïalam ki long kawei kum ka seng.
“Ngi shim ïa kane ka seng kum shipara bad da kaba pynrit ïalade hakhmat U Blei. Ngim ju ïakren bad ngim ju pynwai ïa ka jingïalang hapdeng ka jingsahnud,” u la ong.
Halor ka jingnang ïoh bor jong ka VPP kat nang mih ki sngi, u President u la ong ba ka seng ka la hap husiar ban peitngor ïoh don ki nongbsuh kiba don ka jingthmu ban pynpait pynpra ïa ka seng.
Shuh shuh u la bynrap, “Kine ki seng saiñ pyrthei mynta ki tip ba lada wan ka ilekshon MDC, MP, ym long ban ïaleh bad u prah…ki la sdang ban phah lehse wat da ki briew jong ki ban pan tiket na u prah bad ynda la jop, kin sa wan noh sha ka NPP, sha ka UDP. Ngin hap ban sian bha kum ki nongïalam.”