Shillong, Jymmang 17:
U Bah Marbud Dkhar uba dei kyrtong ka Congress na Mawlai konstitwensi ha kane ka ilekshon MLA ba dang shu dep u lah ban leit pynïasoh pura noh ïalade bad ka seng Voice the People Party (VPP) ha kine ki khyndiat sngi hadien ba u la iehnoh na ka Congress.
Haba ïakren bad u Bah Marbud uba la wan ai jingkyrshan ïa ka jingïakhih ki MLA ka VPP ha jaka ïeng kali hajan ka Additional Secretariat u la pynpaw ba ki paidbah kim pdiang ïa ka seng ri-thor. Kumta u donkam ban ai jingkyrshan ban pynkhlaiñ ïa ka seng trai jylla khamtam ka VPP kaba ju shim ïa ka jingeh jong ka jaidbynriew.
“Ngi donkam nyngkong ïa ka jingïatylli kum ka jaidbynriew, ngam don eiei bad ka seng Congress kumba la ai ka shithi iehnoh kam, hynrei kano-kano ka seng kaba trei ïa u paidbah bad ka jaidbynriew nga kloi ban ïatrei ryngkat” u la ong.
Nangta, u la ong biang, “Nga don jingmut ban rung sha ka seng VPP, hynrei ban ïakhun ïa ka ilekshon MDC ka shong beit ha ka seng namar mynta ngin pynkhlaiñ ïa ka seng VPP namar ngi donkam ïa ka seng kaba trei na bynta ka jaidbynriew.
Nalor kata, u la pynpaw ba ka jingmih noh ka jong u na ka seng Congress ka pyni ba ki paidbah kim sngewtynnad ïa ka seng ri-thor namar u la ïakhun ïa ka ilekshon MDC bad MLA um shym la poi sha ka thong.
Ha kane ka sngi u Bah Marbud u la wan ban ai jingkyrshan ïa ki MLA ka VPP hapoh ka jingïalam u Bah Ardent Basaïawmoit kum u President ha ryngkat bad lai ngut ki MLA jong katei ka seng lem bad ki nongkitkam kiba la wan shong kyllaiñ mungor hakhmat ka jaka ïeng kali hajan Additional Secretariat.
