Shillong, Jymmang 17:
Ka Delhi Capitals ka la lah ban pynliem noh ïa ka Punjab Kings XI da 15 run ha ka jingïalehkai jong ka lympung Indian Premier League (IPL) kaba la long ha ka janmiet jong ka sngi Balang.
Ka Punjab kaba la jop ïa ka jingkynting pisa ka la kam trai ban kawang bol nyngkong bad kam shym la lah ban tehlakam ïa ki nongtied ka Delhi, kiba la lah ban tied haduh 213 run na ki 20 tylli ki over bad hap tang 2 wiket. Baroh ki nongtied ka Delhi kiba la ïoh ka lad ki la lah ban kamai run ha kaba u David Warner u la tied haduh 46 run na ki 31 tylli ki bol, u Prithvi Shaw u la tied 54 run na ki 38 tylli ki bol, u Rilee Rossouw u la tied haduh 82 run tang na ki 37 tylli ki bol bad u Phil Salt u la tied 26 run na ki 14 tylli ki bol bad dei tang u Sam Curran uba la ïoh ban khur ïa ki 2 tylli ki wiket na ka bynta ka Punjab.
Haba wan ban beh ïa kane ka thong, ki nongtied ka Punjab kim shym la ïoh ka jingsdang kaba paka, ha kaba u kapten ka kynhun u Shikhar Dhawan u la duh noh ïa la ka jong ka wiket tang ha ka bol kaba nyngkong ba u la thmu tied. Hynrei lyngba ka jinglah ban ïalehkai bha jong u Atharva Taide uba la tied 55 run na ki 42 tylli ki bol bad u Liam Livingstone 94 run na ki 48 tylli ki bol, la lah ban pyllait ïa ka Punjab na ka jingshah pynliem kput.
Lyngba kane ka jingjop, ka Delhi Capital ka la kamai 10 run na ki 13 tylli ki jingïalehkai, katba ka Punjab Kings ka dang ïoh hi 12 point na ki 13 tylli ki jingïalehkai bad ban nang jngai na ka lad ban ïoh rung sha ka ‘Play Off’ jong kane ka lympung.
