Shillong, Jymmang 17:
Ki longkmie kiba la wan ban kyrshan ïa ka jingïakhih jong ka Voice of the People Party (VPP) ban pynkylla noh ïa ka bhah thung kam thung jam ki la pynpaw ba lada ki pyrkhat tang ïalade kim sngew myntoi shuh ban wan ïakhih, hynrei haba ki pyrkhat ïa ki khun ki ksiew ka pynlong ïa ki ban wan poi haduh Additional Secretariat.
Nalor ki longkmie, ki don ruh ki samla ba shong dukan ha ki dong ha sor Shillong kiba la kit la ki jong ki pla ïew ban wan kyrshan ïa kane ka jingïakhih jong ka VPP namar ki ruh ki sngewkhia ïa ka pateng ban wan.
Kine ki longkmie ki la ïathuh ba ki la ïohsngew lyngba na ki ‘social media’ ba don kane ka jingïalang jong ka VPP, kumta khlem da don ba pynbor ki la wan ban ïasnoh kti lang ban ai jingkyrshan.
Haba ïakren bad ki katto katne ki samla kiba dang khie san, ki la pynpaw ba ka jingleh ka sorkar ka la noh shiliang palat ïa ka rilum Khasi. Ka jingwan ai jingkyrshan ïa kane ka jingïakhih kam mut ba kin pynïapher jaidbynriew, hynrei ki sngewkhia ïa ka jingkyrduh kam kyrduh jam ki samla haba ki la pyndep ïa ka jingpule kim shym la ïoh kam.
“Ngi leit klas man ka sngi ngi sngewkmen haba ngi la pass bha ïa ka eksam, hynrei sngewsih ynda la dei por wad kam ngim shym la ïoh namar ka jingkhia shiliang ka bhah thungkam thungjam” ki la pynpaw.
Kiwei pat ki longkmie kiba dei tang ki nongrep ki la ïathuh ba ki sngewthuh ïa ka jingdonkam ban pynkylla ïa ka bhah thung kam thung jam bad ki kyrmen ba ki paidbah kin ai jingkyrshan ïa ka seng VPP kaba la dawa na ka sorkar ïa ka jingmyntoi ki khun samla.
Kiwei pat ki samla ki la pynpaw ba ka jingkylla shang makia ki khun samla ka dei namar ka jingbym ïoh kam ïoh jam. Kumta lada pynkylla ïa ka bhah thung kam katkum ka jingbun briew kan ïarap ïa ki samla Khasi ban ïoh kam.
