Shillong, Jymmang 17:
U MLA ka VPP na North Shillong, Bah Adelbert Nongrum u la ong ba ka seng Voice of the People Party (VPP) kam kwah ban wanrah ïa ka jingïapher jaidbynriew, hynrei ka kwah ïa ka shongsuk shongsaiñ, tangba ïa kata ka jingsuk donkam ban pynbeit ha Secretariat ne ha ïingdorbar thawaiñ.
Ïa kine ki kyntien u Bah Adelbert u la pynpaw haba ai jingkren ha ka jingïalang shwa ban pynkut ka jingshong kyllaiñ mungor ha jaka ïeng kali hajan ka Additional Secretariat kaba la long ha ka Sngi Balang ban dawa na ka sorkar jylla ba kan pynkylla noh ïa ka bhah thung kam.
Nangta, u la ong ba don kiba kynthoh ba ki nongmihkhmat ki mih sha surok, hynrei kam lei-lei namar ïa ki MLA la jied hi da u paidbah namar ka seng ka hap ban pyrkhat ïa ka jingeh jong ka jaidbynriew.
“Ka VPP kan kren ha Ïingdorbar ne ha Secretariat namar ngin ïakhih ïa ka jingdawa jong ki paidbah ban poi sha ka thong” u la ong.
Nalor kata, u la ong ba ka jingleh da ka Roster System ka pynlong ïa ki paidbah ban dawa pynkylla noh ïa ka bhah thung kam thung jam khnang ban pynbeit noh ïa kine ki kynrum-kynram.
Shuh shuh u la ong ruh balei ki sengbhalang kim wan ïatreilang bad ka seng na ka bynta ka dawbah jong ka jaidbynriew, hynrei ka seng kan pyndep beit ïa ka jingdawa.
“Ngi kwah ban long ki nongthawaiñ ym ban long ki nongthaw pisa namar ka jingduk ka ri bad jaidbynriew namar ka la jur ka jingtuh ïa ka hok jong ki paidbah” u la ong.
