Shillong, Jymmang 17:
Ka Voice of the People Party (VPP) ha ka Sngi Balang ka la khot la wer ïa baroh ki nongshong shnong ban ïa mih paidbah ha ka 19 tarik mynta u bnai ban sngap ïa ka rai kaba mih na ka jingïalang jong ki seng saiñ pyrthei bapher-bapher halor ka ‘Roster System’ bad ka bhah thung kam ne ka ‘Reservation Policy’.
“Lada ka Sorkar ka sngewkhia, shimkhia bad sngewthuh ba ka dei kata ka lynti, ka lah ban pyndep ïa kane ka kam, kam don kano-kano ka jingeh,” la ong u President ba rangbah ka VPP, Bah Ardent Miller Basaïawmoit haba ai jingkren ha ka jingïakhih shong kyllaiñ mungor kaba la pynlong ha jaka pynïeng kali hajan Additional Secretariat ha ka Sngi Balang.
Haba kren halor ka bhah thung kam, u la ong ba um ngeit satia ba ki 2 jaidbynriew jong ka Jylla kin ïa khlad lok noh tang namar ka jingpynbeit ïa ka ‘Reservation Policy’.
Haba pynkynmaw ba ha shuwa ka Sorkar kam shym la treh ïakren halor katei ka mat, u la ong, “Mynta ruh ki dang pyneh, tangba ha ryngkat ka jingpynjem. Hynrei na kato kaba nyngkong kaba ki ong ba kim treh ban ïakren, ki la sdang khot ban ïakren bad jia ryngkhat ba kata ka jingïakren ruh ka sdang mynta ka sngi.”
Halor ka jingïalang jong ki seng saiñ pyrthei ba la khot da ka Sorkar ha ka 19 tarik mynta u bnai, utei u nongïalam u la khot la wer bad kyntu ïa baroh ki nongshong shnong ban ïa mih paidbah lang ha katei ka sngi bad ban sngap kaei ka rai ka ban mih na katei jingïalang.
“Ngin mih paidbah noh la shisngi bad ngi kyntu ïa baroh, ngin pyrta shnong, ngin pyntip paidbah…ngin sngap kaei ka jingmih la shisngi na kata ka jingïalang. Ai ba ka Sorkar kan ïohi ba u paidbah u kyrshan ïa ngi, ai ba ki paidbah ki mat duh kam shi taïew ruh kam lei-lei namar ka lawei kaba ap, dei ka lawei ba phyrnai,” la ong u President da kaba bynrap ban ïa mih ryntih lang la shisngi ha ka por 12 baje ha ka jaka pynïeng kali hajan Additional Secretariat.
Haba pynsngew ba kane ka jingmih paidbah kan pyni sha ka Sorkar ïa ka jingkyrshan ïa ka jingïakhih ban pynkylla bad pynbeit noh ïa ka ‘Reservation Policy’, u la ong, “Lada la shisngi kam mih ka jubab kaba pynhun ïa ngi, da kaba kham tyngeh ngin ïakhih nangne shakhmat.”
Shuh shuh u la bynrap, “Lada ngi sngewthuh ba hadien ka jingpynbeit, ka dang don kata ka jingduna ha ka bhah kam sha kita ki para jong ngi, ngim sngewpher lada ki pyndap tangba kam dei ban long kumba ka long mynta. Lada duna iwei-ar ban pyndap, shu buh mynta lada don ki kam ba lait ha kata ka tnad treikam, don ki para Garo kiba bit ba biang na bynta kata ka kam, kam lei-lei lada phi pyndap, ngim sngewpher lada ki pyndap katkum ka bhah jong ki. Hynrei ban neh kumba ka long mynta, ngin ym pdiang.”
Ka VPP ha ka Sngi Balang ka la pynlong da ka jingïashong kyllaiñ mungor kum ka dak ban pynpaw ïa ka jingpyrshah halor ka jingsngap mynthi ka Sorkar MDA-2 ba la lamkhmat da ka NPP ïa ka jingdawa ban pynsangeh shuwa ïa baroh ki jingthung kam tat ynda da dep bishar thymmai ïa ka ‘Reservation Policy’.
