Chennai, Jymmang:
Ka SRM Global Hospitals ha ki khyndiat sngi kiba la leit noh ka la pynbna ïa ka jingplie paidbah ïa ka Institute of Gastro and Liver Sciences. Ka thong kaba hakhmat eh ba la plie paidbah ïa katei ka jaka pule bad sumar ka dei na ka bynta ban kyntiew ïa ki lad jingsumar kiba bniah na ka bynta ki briew kiba don ïa ki jingpang tor bad kiwei kiwei ki jait jingpang.
Na ka liang u Dr P Sathyanarayanan – President jong ka SRM Global Hospitals u la pynpaw ïa ka jingkmen ba la lah ban plie paidbah ïa katei ka jaka sumar bad pyntip shuh shuh ba katei ka dei shi bynta na ki sienjam jong ka SRM ban pynjanai bad kyntiew shuh shuh ïa ki lad ai jingshakri ha ka liang ka sumar sukher sha ki paidbah nongshong shnong.
U Dr Joy Verghese, Liver Transplant Specialist u la pyntip ba ka SRM Hospitals ka dei kawei na ki jaka sumar kaba la pawkhmat bha ha ka liang ka jinglah jong ka ban pynbiang ïa ki lad jingsumar kiba janai na ka bynta ki nongpang kiba don ïa ki jait jingpang kiba bun jait. U la ïathuh shuh shuh ba da ka jinglah ban plie paidbah sa ïa katei ka jaka sumar kaba thymmai, ka hospital kan lah shuh shuh ban ai ïa ki lad jingshakri kiba kham janai na ka bynta ki nongpang kiba don ïa ki jingpang tor bad ki jingpang dap lyer. U la ïathuh shuh shuh ba lyngba katei ka jaka sumar, ki nongpang kiba wan na ki longïing kiba duna ha ka liang ka ïoh ka kot kin lah ban ïoh ïa ki lad jingsumar kumba long lem kiwei.
Na ka liang u Dr Verghese u la pyntip ba ki lad ai jingsumar kiba thymmai kiba ka jaka sumar kan lah ba pynbiang ki kynthup ïa ka ‘Diagnostic & Therapeutic upper GI Endoscopy’, ‘Biliary Plastic Stent Placement and SEMS Placement’, ‘Diagnostic and Therapeutic Lower GI Endoscopy’ bad kiwei kiwei. Na ka liang u Dr Verghese u la pyntip shuh shuh ba ma u lem bad ka kynhun jong u kin noh synniang ruh na ka bynta ban thaw ïa kawei ka kynhun kaba paka ka ban lah ban ai ïa ki lad jingsumar kiba bha tam na ka bynta ki jingpang tor, ‘gastroenterology’, ‘intensive & emergency liver bad gastro care’, ‘transplant modalities’ bad kiwei kiwei.
U Dr Rajesh, Faculty (Gastroentrology), SRM Medical College Hospital & Research Centre ha ka jingai jingkren jong u, u la ïathuh ba ka jingpang tor ka dei kawei na ki jingpang kaba kham kynrei ha ka ri jong ngi. U la ïathuh shuh shuh ba kiwei kiwei ki jait jingpang kiba la sdang ban kynrei ha ka ri ki kynthup ïa ka ‘Inflammatory Bowel Disease’, ‘Fatty Liver’, ‘Pancreatic Cancer’ bad ‘Colonic Cancer’. U la pyntip ba na ka bynta ban sumar ïa kitei ki jait jingpang, donkam ban pynbiang ïa ki lad jingsumar kiba kat kum kane ka juk stad kaba mynta bad kumjuh ruh ban thaw da kawei ka jaka sumar kaba kyrpang.
Na ka linag u Dr VP Chandrasekhar, COO jong ka SRM Global Hospitals ha ka jingai jingkren jong u, u la pyntip ba kawei na ki lad ban ïada na ka jingpang tor ka long ban khmih bniah bad bud ïa ka rukom im kaba khuid ba suba – khamtam ha ka liang ka bam ka dih.
Kiwei kiwei ki ‘riew pawkhmat kiba la wan ban ïashim bynta ha katei ka sngi ki kynthup ïa u Dr Mythili, Additional Registrar, SRMIST bad kiwei kiwei.
