Nongstoiñ, Jymmang 17:
Ka West Khasi Hills District Badminton Association (WKHDBA) ka la pynkhreh shaid-shaid ban pynlong noh ïa ka lympung ïalehkai Badminton ïa kaba la tip kum ka ‘Inter School Badminton Tournament 2023’.
Katkum ka kyrwoh khubor ba la pyllait da ka Tournament Committee jong katei ka lympung la ong, ba ïa katei ka lympung ïalehkai yn sdang naduh ka 31 tarik u Jymmang 2023 ha Indoor Stadium Nongstoiñ.
Shuh shuh la pyntip ruh ba ha katei ka lympung, ki jingïalehkai kin long naduh ka team event, individual Catagory event ba kynthup ha ki kyrdan bapher bapher ba la phiah kata ha ka U-13, U-16 bad ka U-19 kynthei bad shynrang.
Ka kyrwoh khubor ka pyntip ruh ba kino kino kiba kwah ban ïa shim bynta, ka tarik kaba khaduh ban phah ne pynpoi ïa ki form kan long ha lane shuwa ka 25 tarik u bnai Jymmang 2023. ïa ka jingtip ba kham bniah ki lah ban ïakynduh ïa u Bah T Diengngan uba long u Chairman Tournament Committee, ka Kong Eureka Kharbani kaba dei ka Convener Tournament Committee bad kiwei kiwei ki nongkitkam ka Synjuk.
