Shillong, Jymmang 17:
Ka Niaw Wasa United ka la lah ban khur ïa ka jingjop kaba nyngkong ha ka lympung Meghalaya State League (MCL) 2023 da kaba pynliem noh ïa ka Rymbai Iawpynsing Sports Club ha ka jing-ïalehkai kaba la long ha Kiang Nangbah Stadium, Jowai ha ka sngi Balang.
Ha kane ka jingïaleh-kai jong ka Group-B, ka Niaw Wasa ka la lah ban pynliem noh da 2-0 kol ïa ka Rymbai Iawpynsing SC. ïa kine ar tylli ki kol la ïoh ban thep da u Sandeep Siangshai ha ka minit kaba 45’+3 bad u Dashngain Sukhlain ha ka minit kaba 82.
Tang kane ka la long ka jingïalehkai ha ka sngi, ha kaba ïa ki jingïalehkai na kiwei pat ki group la ai shongthait shi sngi na ka bynta ba kin ïoh ka por kaba biang ban pynkhreh bha ïa lade na ka bynta ki jingïalehkai ki ban sa bud ha ka sngi Palei.
Ha ka sngi Palei, ki jing -ïalehkai kata ha ka Group-A ha Shillong kan long hapdeng ka Jyntru Football Club pyrshah ïa ka Umrit Sports Club ha ka por 3 baje janmiet. Ha ka Group-B ha Jowai pat ka jingïakhun kan long hapdeng ka Sein Pynbha-lang Sports Club pyrshah ïa ka Rangdajied United Football Club ha ka por 2:30 mynsngi.
Yn nym don kano kano ka jingïalehkai ha ka Group-C ha Mawkyrwat, katba ha ka Group-D ha Tura ka jingïalehkai kan long hapdeng ka Warima Youth Club pyrshah ïa ka Selsella Sports Association ha ka por 3 baje janmiet.
