Shillong, Jymmang 17:
U Myntri Rangbah ka jylla, u Conrad K Sangma, u la ong ba ka sorkar kan sa pynlong ïa ka jingthung kam hapoh ka skul Shillong Higher Secondary School namar ba watla ïa katei ka skul la pynkiew kyrdan sha ka Higher Secondary School, hynrei ka jingdon jong ki nonghikai skul bad ki nongtrei ki ban peit ïa katei ka skul ki dang duna bha.
Haba kren sha ki lad pathai khubor ha ka Sngi Balang hadien ka jingïalang jong ka kynhun myntri, u Myntri Rangbah u la ong ba ha ka jingïalang la ïakren ruh halor ka jingthung kam ïa ki briew hapoh ka State NSS Cell bad ïa kane la bthah da ka Sorkar India namar kane ka dei ka tnad treikam kaba peit ïa ki jingïashim bynta jong ki khynnah pule kiba don ha ki jaka pule bapher bapher jong ka jylla.
Sa kawei pat ka mat kaba la ïakren ha katei ka jingïalang ka long ba ka sorkar jylla ka la pynkylla ïa ki katto katne ki kyndon jong ka Meghalaya State Food Commission Rules ha kaba ïadei bad ka samoi jong u shongknor bad ïa kane la leh ha ryngkat ki kyndon kiba ïahap bad ka Ri hi baroh kawei.
Shuh shuh, ha katei ka sngi ka kynhun Myntri ka la ïakren ruh ha kaba ïadei bad ka jingpynkylla kyrteng ïa ka jaka ïaid kai pyngngad kaba la tip kum ka Lady Hydari Park. Ka kynhun Myntri ka la rai ban pynkylla kyrteng noh ïa kane ka jaka sha ka Phan Nonglait Park bad kane ka dei ka rai kaba la shim naduh ki por kiba mynshuwa bad u Myntri Rangbah u la ong ba ka daw bym pat lah ban pynskhem ïa ka kyrteng thymmai jong katei ka jaka ïaid kai pyngngad ka dei namar ki jingkylla ha kaba ïadei bad ki bor ba dei peit hangne hangtai, hynrei mynta la lah ban pynskhem ïa kane ka jingpynkylla kyrteng ïa kane ka jaka.
Na ka liang u Myntri Rangbah ka jylla, u la ïathuh ruh ba ka sorkar jylla ka la rai ban pynkiew ïa ka jingai khusnam da ka pisa (Cash Award) sha ki nongjop ïa ka khusnam riewshlur jong ka tnad shipai kiba kynthup naduh ki shipai um, shipai liengsuiñ bad ki shipai ryngkew.
