Chennai, Jymmang:
Ka Indo National Limited – ka kompani kaba la seng ha u snem 1972 da ka jingïatreilang hapdeng u P. Obul Reddy bad ka Matsushita Electric Industrial Co., Ltd. of Japan ka la kylla long kawei na ki kompani kaba la bna nam ha kylleng ka ri India ha kaba ïadei bad ka jingpynmih ïa ki battery bapher bapher. Ha u snem 1973, ïa ka karkhana kaba nyngkong eh jong ka INL la tei ha Nellore, Andhra Pradesh; bad na ka liang ka Nippo ka la lah ban pynmih paidbah ïa u mar u ba nyngkong eh jong ka ïa u ba la tip kyrteng kum u ‘Nippo Hyper’. Naduh katei ka kynti, ka kompani ka la lah ban khring ïa ki nongthied nongpeit khamtam kito kiba dei na ki thaiñ nongkyndong.
Ha ki 50 snem kiba la leit noh, na ka liang ka Nippo ka la lah ruh ban pynmih sa ïa kiwei kiwei ki jait mar na ka bynta ban pynïar shuh shuh ïa ka kompani bad kumjuh ruh ban pynhun ïa ka jingdawa na ki nongthied nongpeit. Ha kine ki sngi kiba mynta, ka kompani ka la lah ban pynmih ïa ki mar kiba laiphew jait la ka jong ha ka liang ki ‘battery’, ki kor tba jingshai (torch), ki kor pynïap kaiñ pyrjong (mosquito bat), ki kor Led bad kiwei kiwei ki kor ilektrik.
Ha ki khyndiat sngi kiba la lei noh, na ka liang ka INL ka la pyllait paidbah ruh ïa ka Nippo Brand Logo kaba thymmai – kaba dei shi bynta na ka jingrakhe ïa ka lyngkhuh dap 50 snem jong ka kompani.
Kat kum ka jingïathuh jong u Aditya Reddy – Joint Managing Director u la ïathuh ba une u snem u ba mynta u dei u snem ba ka kompani Nippo ka rakhe ïa ka lyngkhuh dap 50 snem bad na ka liang ka kompani ka la shim ïa ki sienjam ban phai khmat sha ka jingïaid lynti kaba thymmai bad kaba kham janai ha ka liang ka jinglah ban ai ïa ki lad jingshakri kiba paka na ka bynta ki nongthied nongpet kiba na kylleng ki bynta jong ka ri India.
Na ka liang u Mr. Dwaraknath Reddy, Managing Director ha ka jingai jingkren jong u, u la pyntip ba lyngba ka jingïaid lynti jong ka INL lyngba ki phew snem kiba la leit noh, u dap da ka jingkmen kaba khraw ba ka kompani ka la lah ban rakhe ïa ka lyngkhuh dap 50 snem. U la pynpaw ba na ka liang ka jong u, u don ïa ka jingkyrmen kaba khraw ba ka Nippo kan lah shuh shuh ban kiew sha ki kyrdan kiba kham shajrong.
