Shillong, Jymmang 17:
Ka Inter Milan ka la ïoh rung sha ka final jong ka lympung Champions League ha ka sien kaba nyngkong ha kine ki 13 snem hadien ba ka la lah ban pynliem noh ïa ka AC Milan ha ka semi-final jong kane ka lympung.
Ka sien kaba khatduh ba ka Inter Milan ka la rung sha ka final bad ban rah syndon ïa ka nam lahduh jong ka lympung Champions League ka dei ha u snem 2010, kaba dei ruh ka snem ba ka la rah ïa ka nam lahduh jong ka Seria A bad ruh ka nam lahduh ka Coppa Italia, kiba dei ki lai tylli ki nam lahduh kiba heh.
Ka jingpynthikna jong ka Inter Milan ban rung sha ka final, ka la wan ruh lyngba ka shi kol kaba la ïoh thep da u Lautaro Martinez ha ka jingïa-khun ha ka ‘second leg’ ban jop da 1-0 kol ïa ka AC Milan kaba la long ha San Siro.
Lah ban pynkynmaw ba ha ka ‘first leg’ ka Inter Milan ka la jop da 2-0 kol ïa ka AC Milan bad kumta haba kheiñ ïa ka aggregate ka la jop da 3-0 kol.
Hadien kane ka jing-jop, ka Inter Milan kan hap ban pynkhreh bha ïa lade ban ïakhun pat ïa ka final jong kane ka lympung ka ban long ha ka 10 tarik u Jylliew ha Istanbul bad ka jingïakhun kan long pyrshah ïa ka Manchester City lane ka Real Madrid.
Ka jingïalehkai ïa ka second leg ka la long kaba itynnad bad ïakhaid bha, ha kaba baroh ar liang ki la ïakhun tyngeh khamtam na ka liang ka AC Milan kaba la buh jingeh ha kaba sdang hynrei ka jingbym lah pynkhih jar, ka la plie lad ïa ki rang-ïalehkai ka Inter Milan ban ïoh mynsiem.
