Nongstoiñ, Jymmang 17:
Ka jingkheiñ sting jong ka tnad ba dei peit ha kaba ïadei bad ka jingtwa jong ka surokbah National Highway 127 B ha ka shnong Nongshram Ading jong ka surok Nongstoiñ sha Rongjeng ka la paw shai ha kaba haduh mynta ym shym la pat lah ban maramot wat hadien lai snem duna ba ka la don ka jingtwa.
Kum ban shu pynkynmaw katei ka surok mynta ka la kynjoh sha ka lai snem duna naduh ba ha ka miet jong ka 12 tarik Naitung 2020 ka la twa bad pait kynsan na ki bynta ba hapdeng jong ka surok kaba la buh jingma ruh ïa ki paidbah kiba leit ba wan lyngba kane ka surok.
Na ka liang jong ka tnad PWD (R) Western Circle lyngba u SE ha katei ka snem kaba jia, ka la ong ba katei ka jingtwa ka la pynlong ruh ïa katei ka bynta jong ka surok ba kan ngam noh kumba shi phut shiteng bad ka jingshah ktah ka la kot kumba 50 meter eiei.
La ong ruh ba ki kali ki dang lah ban ïaid ban ïeng ha kaba na ka liang jong ka tnad ka la pyrshang ban ïarap ban maramot ïa katei ka surok hynrei katkum ka jingpeit mynta katei ka surok ka don hapdeng ka jingma ïa ka ïaid ka ïeng jong ki paidbah namar ba lada jia ba u slap un jur khlem pep katei ka surok kan twa biang.
Halor katei ka jingtwa jong katei ka surok, ha ka jingshisha na ka liang u SE katei ka tnad u la ïathuh ba la dep ban phah ïa ka kaiphod sha u C.E. ka National Highway ba kin leh ïa kaba donkam hynrei imat katei ka kaiphod ïa kaba la phah kam shym la poi shaei shaei.
Ki paidbah nongshong shnong katei ka thaiñ haba kren halor katei ka surok, ki la kyntu ïa ka tnad ba dei peit ban shimkhia noh ha shwa ba kan don ka jingtwa sa shisien.
