Shillong, Jymmang 17:
Ka lympung Super Cup bad Indian Women’s League (IWL) ki dei ki lympung ba la pynlong ha u bnai Ïaïong bad Jymmang mynta u snem, hynrei na ka liang jong ka All India Football Federation (AIFF) ha ka sngi Balang ka la ong ba kan pyrshang ban nym pynlong ïa kine ki lympung ha kitei ar tylli ki bnai ha ki por ban wan namar ka jingshit kyrang ka suiñ bneng.
Ka lympung Super Cup, ka dei kaba lympung ïakhun hapdeng ki club ka I-League bad Indian Super League, kaba la pynlong ha Kerala naduh ka 3 tarik Ïaïong haduh 25 tarik katba ka lympung IWL kaba dang ïaid shakhmat mynta, ka la sdang ha ka 26 tarik Ïaïong ha Ahmedabad.
“Mynta u bnai, kata hadien ba kut jong kane ka lympung ïalehkai ki kynthei, ka lympung ïalehkai phutbol kan sa kut noh. Kan dei ka kamram jong ngi ba kumno ban pyrkhat khamtam halor ka jinglong ka suiñ bneng ha ka ri ka jong ngi, kumta ngi hap ban kiar na kaba pynlong ïa kine ki lympung ha u bnai Ïaïong bad Jymmang,” la ong u President ka AIFF u Kalyan Chaubey.
“Ngim kwah ba ki nongïalehkai ki jong ngi kin mad jingeh bad shem shitom ha kum kine ki bnai ba shit kyrang ka suiñ bneng,” la ong sa uwei na ki dkhot ka AIFF da kaba bynrap ba kiba bun ki tarik ban poi ki lympung shaduh u bnai Jymmang ka la wan hadien ka jingshah ktah na ka khlam Covid-19.
U Kalyan Chaubey u la ong haduh ba kut jong ka lympung South Asian Football Federation Cup (ka ban long hapdeng ka 21 tarik Jylliew haduh 4 tarik Naitung) ha Bengaluru, ka kynhun ka Ri kan hap ban ïalehkai haduh 10 haduh 12 tylli ki jingïalehkai.
U la ong ba ka India ka kyrmen ruh ban shah khot sngewbha ban ïalehkai ha ka lympung Merdeka Cup ha Malaysia, ka ban pynlong mynta u snem ha u bnai Risaw, bad kumjuh ruh ha ka lympung Kings Cup ha Thailand, ka ban plie lad ïa ka India ban ïoh ïalehkai bun tylli ki jingïa-lehkai kum ka jingpyn-khreh na ka bynta ka Asian Cup ka ban long ha Doha ha u Kyllalyngkot, 2024.
“Ngi dang pyrshang ban ïoh ban ai kham bun tylli ki jingïalehkai na ka bynta kane ka kynhun ïalehkai ka Ri, khnang ba kum ki rangïalehkai kin kham lah ban pyntbit bha ïalade bad ruh kumno ban ïa sngewthuh jingmut lang hapdeng ki para nongïalehkai haba ki don hapoh ka madan namar ka jingduna palat ki jingïalehkai ka pynduhlad ba kin ïasngewthuh para nongïalehkai,” u la ong.
