Shillong, Jymmang 17:
U kapten ka Italy bad u Juventus u Leonardo Bonucci u la pynbna ba un shongthait noh na ka kam ïalehkai ha kaba kut jong ka aïom ban wan.
Une u rangïalehkai ba la 36 snem ka rta, u la don bynta ha kaba jop bad rah ïa ka nam lahduh ka lympung Serie A haduh phra sien bad u la mih madan ruh ha ka sien kaba 500 dang ha ka taïew ba la lah ha ka jingïakhun pyrshah ïa ka Sevilla.
U la ïoh ban ïadon bynta ruh ha ki 120 tylli ki jingïalehkai na ka bynta ka Ri bad u la dei ruh uba don bynta bad ka kynhun jong ka Italy kaba la pynliem noh ïa ka England ban rah ïa ka nam lahduh jong ka Euro 2020 kaba la long ha u Naitung, 2021.
“Ka jingphong ïa kane ka sopti ka la long kumba im ha ka jingphoh sniew na ka bynta ki 12 tylli ki snem,” la ong u Bonucci ha ka youtube channel jong ka Juventus.
“Baroh kiei kiei kiba nga la leh, ka dei beit na ka bynta kane ka sopti kaba long kum ka snieh doh kaba ar ka jong nga,” u la ong.
U Bonucci, uba ka kontrak ka jong u kan sa kut noh ha ka aiom ka ban wan, u dei uba la sdang ïa ka jingim ïalehkai phutbol ka jong u ha Inter Milan ha u snem 2005, ha kaba u la jop ruh ïa ka nam lahduh kaba nyngong jong ka Serie A ha u snem 2005-06.
Une u rangïalehkai shadien u la ïadon bynta ruh bad ki katto katne ki club kum ha ka Treviso, Pisa, Genoa bad Bari shwa ban pynïasoh pat sha ka Juventus ha u snem 2010, bad ban ïoh ïalehkai lang ryngkat bad u Andrea Barzagli, Giorgio Chiellini bad u nongap kol u Gianluigi Buffon, kaba la long ruh ka club kaba radbah ha kine ki phew snem ha Italy.
Ka Juventus ka la jop haduh khyndai sien kynthih ïa ka nam lahduh ka Seria A, kata naduh u snem 2011-12 haduh u 2019-20, ha kaba u Bonucci u la don bynta ha ki phra tylli napdeng kine, kata hadien ba u la pynlut kawei ka aiom ïalehkai na ka club AC Milan ha u snem 2017-2018.
U Bonucci u la mihkhmat nyngkong eh pat na ka bynta ka Italy ha u bnai Lber jong u snem 2010 bad hadien saw snem jong ka jingïadon bynta, u la shah jied pat kum u kapten ka kynhun.
