Shillong, Jymmang 17:
Halor ka jingdawa kaba la slem na ki nongkyrshan, ki bor jong ka Mohun Bagan ha ka sngi Balang ki la pynbna ba kin sa weng noh ïa ka kyntien ATK na ka kyrteng jong kane ka club phutbol kaba radbah bad don 133 snem.
Ka club, ïa kaba la long trai da ka RP Sanjiv Goenka Group, yn sa tip noh da ka kyrteng Mohun Bagan Super Giant, ka RP Sanjiv Goenka Group ka dei ruh kaba long trai ïa ka club ïalehkai kriket ha ka lympung Indian Premier League ka Lucknow Super Giants.
“Hadien jong ka jingshong jingïalang jong ka Board kaba la long ha ka sngi Balang, ïa kane ka kyrteng ba thymmai jong ka club kata ka Mohun Bagan Super Giant (MBSG) yn pyntreikam noh naduh ka 1 tarik Jylliew, 2023,” la pynbna ka club.
Ka ATK Mohun Bagan hadien ba ka la pynïasoh sha ka lympung Indian Super League, ka la ïoh rah ruh ïa ka nam lahduh jong kane ka lympung mynta u snem da ka jingjop ïa ka Bengaluru Football Club da 4-3 kol kaba la wan lyngba ka jingïashut tie-breaker, kaba la long ha u bnai Lber mynta u snem.
Hadien kane ka jingrah ïa ka nam lahduh, ka Goenka ka la pynbna ba ka kyntien ATK kan sa jah noh hadien lai snem bad ba yn sa tip noh kum ka MBSG, hynrei ïa kane ka kyrteng la lah ban pynlong pura tad haduh hadien ka jingïalang ka Board.
Ïa ka Mohun Bagan la tip kum ka ATK ne ka Atletico de Kolkata namar ka jingïateh lok bad ka club na Spain ka Atletico Madrid hynrei hadien 3 tylli ki snem, ka Atletico Madrid ka la ïakhlad lok noh bad ïa ka 25 persen ka bhah ka la die noh sha ka RPSG Group.
