Shillong, Jymmang 18:
Ka Rangdajied United FC ka la pynjem khnap ïa ka Sein Pynbhalang haduh shiteng dorjon da 6-0 kol ha ka jingïalehkai Group-B jong ka Meghalaya State League 2023 kaba la long ha ka Sngi Palei ha Kiang Nangbah Stadium, Jowai.
Ha ka jingïalehkai jong ka Group-A (Shillong zone), ka Jyntru FC bad ka Umrit SC ki la ïakhaid mar 1-1 kol ha madan MFA, katba ha ka Group-D (Tura zone) ka Selsella Sports Association ka la jop da 3-1 kol ïa ka Warima Youth Club ha madan Chandmari.
Ka Rangdajied ka la ïaleh ban thep bun kol namar ka sngewthuh shai ba ki kynhun ki ban wan ha ka kyrdan ba hakhlieh ki long lyngba ka jingïapher kol ne ‘goal difference’, hynrei kane ka kynhun ka la pynlehnohei ïa ar tylli ki kabu ksiar lyngba ka penalty.
Hynrei hadien kane ka kynhun ka la ïakhun tyngeh ha kaba u Tremiki Lamurong u la khur ïa ka hat-trick ha kaba u la thep ha ka minit kaba 63, 76 bad u 77. Ïa ki ar kol la thep da u Banshanbha Khongsdam (19 & 75) bad ïa ka shi kol la thep da u Wanlamsuk Nongkhlaw (90+2).
Lyngba kane ka jingjop ka Rangdajied ka la lah ban tam ïa ka Ladthadlaboh SC, kaba la lah ban pynliem ïa ka Sein Pynbhalang da 5-0 kol ha ka 13 tarik mynta u bnai.
Ha Tura, ka Warima ka la shah thep kol nyngkong ha ka Selsella lyngba u Benjamin Marak ha ka minit kaba 13, hynrei u Charlie R. Marak u la lah ban pynïakhaid kylla lyngba ka penalty ha ka minit kaba 50. U Walseng Sangma (64 & 66) u la ïoh ban thep ar kol na ak bynta ban pynlong ïa ka Selsella ban khur ïa ka jingjop.
Haba phai sha ka jingïakhun ha nongbah Shillong, ka Jyntru ka la ïoh ban pynkhih jar nyngkong eh lyngba u Badaminot Nongphlang ha ka minit kaba 16. Hynrei dei ha ka minit kaba 63 ka Umrit ka la lah ban pynïakhaid kylla lyngba u Donald Nongtri.
