Shillong, Jymmang 18:
U Myntri Rangbah ka Jylla u Conrad K. Sangma u la pynpaw ïa ka jingangnud ban don napdeng ki nongïalehkai ka Jylla ki ban lah ban khur takma ha ka Olympic 2032 ka ban long ha Australia.
Kane ka jingangnud utei u Myntri Rangbah ka dang long kaba jwat bha namar haduh mynta ym pat don wat tang iwei na ki nongïalehkai ka Jylla ki ban ïoh shwa tang ban ïoh ïashim bynta ha ka Olympic.
Haba pynpaw ha ka jingïalang plie ïa ka shlem ai jinghikai jong ka Bhaichung Bhutia Football School ha kane ka nongbah bad kaba long ruh ka sien kaba nyngkong eh ha ka thaiñ Shatei Lam Mihngi, u Conrad u long, “Wat la ka long ka thong kaba eh bha, hynrei lada ym don ïa ka thong ngin yn lah ban kynjoh sha kata ka thong jong ka jingjop. Ka Jylla ka thrang eh ban khur takma ha ka Olympic,” u la bynrap.
U la ong ba dei na kane ka daw ba ka Sorkar ka la pynlong ban ïaid kylleng ki shnong ki thaw ha nongkyndong ha baroh ki district na ka bynta ban ïit ïa ki khynnah ba donsap ha ki jingïalehkai bapher bapher. “Lyngba ka jingpyndonkam ïa ki kor ki bor ka juk mynta ha ryngkat ka jingïatrei lang bad kawei ka kynhun jong ka Edge10 kaba na Austalia bad lyngba ka jingbishar bniah la lap ba ki khynnah ki don shisha ïa ki sap ïalehkai ba kyrpang. Haduh mynta ki don kumba 200 ngut ki khynnah kiba tbit kiba don ïa ki sap ba kyrpang ha ki jingïalehkai bapher bapher.”
“Kine ki khynnah kiba mih na ki jaka ha nongkyndong ki lah ban mareh kham stet khlem ki juti kiba biang bad haba bishar bniah kine ki khynnah ki lah ban ïaryngkat kyrdan bad kiwei ki nongïalehkai ki ri ka pyrthei.”
“Kumta ka long kaba donkam ban don ïa ki tiar ki tar bad ki jaka ïalehkai kiba paka khnang ban saiñdur ïa ka lawei ka jong ki khnang ba ha ki shiphew snem ki ban wan kin sa lah ban pynpaw ïa ka jingtbit bad kin sa lah ruh ban khur takma ha ka Olympic.”
