Itanagar, Jymmang:
Ki bor pulit jong ka jylla Arunachal Pradesh ha ka 16 tarik mynta u bnai ki la pyntip ba ki suba dkhot jong ka seng kieng atiar ULFA-I ki la pyllait noh ïa u nongtrei jong kawei ka jaka theh umphniang kali ïa u ba ki la rahbor naduh ka 26 tarik jong u bnai Ïaïong, 2023 na ka thaiñ Namsai District.
Kat kum ka jingïathuh jong u SP ka thaiñ Namsai – DW Thungon u la pyntip ba ïa u Dinesh Sharma u ba dei u nongtrei jong kawei ka jaka theh umphniang kali kaba don ha ka shnong Chongkham la pyllait noh da ki suba dkhot seng kieng atiar ha ka sngi Ba-ar mynta ka taiew ha ka thaiñ Medo (Wakro circle), Lohit district.
Na ka liang u heh pulit u la pyntip shuh shuh ba u Dinesh u dang don hapdeng ka jingshitom jingmut jingpyrkhat, bad na ka liang ki bor pulit ki la sdang ban pynlong ïa ki kam tohkit khnang ban ïoh kem ïa ki runar kiba la donkti ban rahbor ïa u.
Halor katei ka jingjia, na ka liang ki nongshong shnong jong ka thaiñ ki la kynnoh ba dei ki dkhot jong ka seng ULFA-I kiba la donkti ban rahbor ïa u Dinesh na ka jaka theh umphniang kali kaba dei trai da u Jenia Namchoom – u dkhot ka Zilla Parishad (ZPM).
Kat kum ki jingïoh lum jingtip la ïathuh ba na ka liang ki runar ha ka por ba ki la leit ban rahbor ïa u Dinesh Sharma ki la donkti ruh ban synreit kuli bad ha katei ka jingjia u nongñiah kali jong u trai ka jaka theh umphniang u ba la tip kyrteng kum u Mithai Marandi (28 snem ka rta) u la ïoh ïa ki jingmynsaw kiba jur bad tang hadien katto katne sngi u la khlad noh hapdeng ka jingshah sumar ha kawei ka hospital kaba don ha ka thaiñ Dibrugarh district, Assam.
