Shillong, Jymmang 18:
Ki MDC ka NPP kiba synroplang bad ka UDP ha Khasi Hills Autonomous District Council (KHADC) ki lah ban shu hun noh ban bteng biang u Bah Titos Chyne kum u CEM haduh ban da kut ka samoi treikam ynda wan biang ka ilekshon hadien ba u kyrtong ka NPP um shym la ïoh ïa ka jingjop ha Sohïong konstitwensi.
Ha ka por ba ka dang jur ka jingïakawang ktien ha ka jingïalap ilekshon ha Sohïong, ki MDC ka NPP ki la byrngem ban pynkhyllem noh ïa ka shuki CEM u Bah Titos Chyne namar ka jingbym burom ka NPP ha kiba bun ki kam hima sima bad kiwei de ki kam kiba ïatyngkhuh ha ki kam ilekshon ba dang shu dep.
Ki khubor kiba kham paw pyrthei bha ba u Bah Titos u la weng ïa u Lyngdoh Sohïong ha shwa ban wan ka ilekshon MLA ha u Rymphang 2023 khlem da kynjoh ktien ïa u MDC ka thaiñ, nangta sa kiwei de ki kam hima kaba la mih halor ka jingkynnoh ba leh donbor.
Shuh shuh ki khubor ki la ïathuh ba hadien ka ilekshon MLA ha Sohïong, ki MDC ka NPP ki lah ban pynkhyllem ïa ka shuki u Bah Titos hynrei la sngewthuh ba ki bor ba halor jong ka NPP kim pat shah ban weng ïa ka jingïatreilang bad ka UDP namar ki burom naduh ba ki la donlang ha ka sorkar MDA kaba nyngkong kaba la ïalam hi da ka NPP ïa ka sorkar.
La sngewthuh ba lada ka NPP ka kwah ban pynkhyllem ïa ka shuki jong u Bah Titos ka la lah bha, hynrei ki MDC kim nud ban ïaid shakhmat namar ki khlem ïoh jingbit na ki bor ba hajrong khamtam na u Conrad K Sangma uba dei u President ba rangbah ka NPP.
Haduh mynta ki MDC ka NPP ki don 12 ngut, katba ki MDC ka UDP ki don 9 ngut, ki MDC ka Congress ki don 6 ngut bad kiwei de.
Haba pyrshang ban ïakren bad ki katto katne ngut ki MDC ka NPP ki la pynpaw ba haduh mynta ki dang shaniah ïa u Bah Titos Chyne ba un long kum u CEM ka KHADC.
