Shillong, Jymmang 18:
Ka kynhun Meghalaya Democratic Alliance (MDA) ka la ïatai ïa ka Roster System kaba dei ban pyntreikam katkum ka jingbthah ka Ïingbishar Meghalaya High Court, ha kaba u Myntri Rangbah u Conrad K Sangma u la ong ba kiba bun ki para dkhot ki la sngewthuh bad ki don kiba dang artatien, tangba lada don kano-kano ka jingbym shai, kin sa wan biang sha ka Sorkar.
Haba kren sha ki lad pathai khubor, u Conrad u la ong ba kaei kaba rai ka long kawei, namar ki la sngewthuh bad ïaroh ïa ka bynta kaba dei ban pynshai bad batai, wat la ki don ruh ki jingartatien.
Hynrei u la ong ba ki don ruh shibun ki jingkylli bad ki la kyrpad ba kin sa leit ban ïatai biang bad lada kim shai bad artatien kin sa wan biang.
Haba pyrshang ban pynshai u Conrad u la ong ba ka bhah khlem ka rukom kheiñ (Roster) kam don jingmut.
Halor ka jingkylli ba ka don ka jingkynnoh ba ka don ka jingïohnong ïa kiwei bad duhnong ïa kiwei pat, u Myntri Rangbah u la ong ba kam don ka jingmyntoi ïano-ïano ne uno-uno u briew.
“Ka shu long ba haba don ka Reservation, ka don ruh ka roster kaba dei ban don katkum ba dei ban don naduh ka sngi banyngkong ba pyntreikam ïa ka bhah thung kam. Ka Roster ka ailad ïa kano-kano ka kam ba kan leit sha kano-kano ka jaitbynriew katkum kaba dei ban ïoh,” u la ong.
U la ong ba ban shu ong ba ka roster khlem da ktah ïa ka Reservation kam don jingmut, ka dei kaba bakla namarba ka reservation ka dei da kawei pat ka phang, hynrei ka reservation khlem ka roster kam don jingmut satia.
U la bynrap ba ka Roster ka dei kum ka skhim ban pyntreikam ïa ka reservation policy ha ka bynta ba dei.
Hynrei u la ong ba ka Reservation Policy kam dei ka phang ban ïakren la ka dei mynnin, mynta ne lashai, namar ka jingïakren ka dei shwa ïa ka Roster.
U la ïathuh ba ha ka jingïalang ka MDA, ki MLA bad nongïalam ka MDA ki la ai jingmut ruh ha kaba la shim ïa kita ki jingpynpaw.
Kumta u Myntri Rangbah u la ong ba ka Sorkar Jylla mynta ka ïaid shakhmat ban poi sha baroh kiba donbynta naduh ki MLA ban pynshai ïa ki ha kano ka rukom ka Sorkar ka bud ïa ka rukom pyntreikam.
