Aizawl, Jymmang:
Hadien ka jingïoh ïa ki jingtip kiba bniah, ka kynhun Crime Investigation Department (Special Branch) jong ka tnat pulit ka jylla Mizoram ha ka sngi Ba-ar mynta ka taiew ka la ïoh ban kurup ïa haduh T.22.2 lak ka pisa thok (Fake Indian Currency Note) na ka shnong Vairengte, Kolasib district – ka shnong kaba don markhap bad ka jylla Assam.
Ha katei ka jingjia, na ka liang ki bor pulit ki la ïoh ruh ban kem ïa 2 ngut ki briew kiba la tip kyrteng kum ka Laltanpui (42 snem ka rta), na ka thaiñ Vairengte bad u Lallungmuana (40 snem ka rta) na ka thaiñ N Vanlaiphai, Serchhip district.
Ki pisa thok kiba la ïoh ban kurup ha katei ka sngi ki kynthup ïa ki lut T.2,000 (1,007 tylli) bad ki lut T.500 (1,012 tylli). Halor katei ka jingjia, na ka liang ki bor pulit ki la pynrung da ka mokotduma khnang ban pynlong ïa ki jingtohkit kiba dang sah.
