Shillong, Jymmang 18:
U khlur ïalehkai phutbol barim ka ri India u Bhaichung Bhutia u la pynpaw ba ka por ka la dei ïa u khlur ïalehkai barim ka Meghalaya bad India, u Eugeneson Lyngdoh ba un shimti noh kum u nongïalam ka Meghalaya Football Association.
Haba ïakren bad ki nongthoh khubor ha ka Sngi Palei, u Bhutia u la ong, “U Bah Larsing Ming Sawyan (uba dang bat haduh ar sien kynthih kum u President ka MFA), u la noh synñiang shibun ha ka kam ïalehkai phutbol ha Meghalaya, hynrei ka por ka la dei ban wanrah ka jingkylla ha kaba u paralok ba ïalehkai lang (u Eugeneson) u la dei ban mih bujli khnang ba kan long ka jingïarap kaba khraw ban kyntiew ïa ki kam ïalehkai phutbol ha ka jylla Meghalaya hi baroh kawei.”
Kumba ka paw kane ka synjuk ïalehkai jong ka MFA ka dei ban ïoh noh da ki nongkitkam kiba thymmai hadien ba ka samoi treikam ka la poi sha kaba kut ha u snem ba la dep. Hynrei, kat haduh mynta ym pat shym la lah ban pynlong ïa ka ilekshon ban jied ïa ki nongkitkam kiba thymmai.
Ha kaba ïadei bad ka Vision 2047 ba la buh thong da ka All Indian Football Federation (AIFF), u Bhutia u la ong ba kum kine ki jingbuh thong ki la don naduh ki por kiba mynshwa, hynrei kan ym don jingmut eiei lada ym lah ban pyntreikam ïa ki ha ka rukom kaba dei.
Kum ban shu pynkynmaw ba hadien ba u la shongthait na ka kam ïalehkai, u Eugeneson u la shah jied kum u MLA ka Mawphlang Constituency bad ruh kum u President ka Shillong Sports Association (SSA) hadien ka jingkhlad noh jong u kpa.
