Shillong, Jymmang 18:
Ki nonghikai skul kiba don hapoh ka shatri jong ka Meghalaya SSA Schools Association lyngba ka kyrwoh ‘video’ ba la phah da u President ka MSSASA, u Bah Aristotle C Rymbai, u la ong ba ka sorkar ka la pynkhreh ban siew ïa ka ‘Arrear’ kaba sahteng jong ki nonghikai skul naduh ka 1 tarik u Naitung, 2016 haduh ka 28 tarik u Rymphang, 2017.
Katei ka synjuk ka la ujor da ka Writ Petition pyrshah ïa ka sorkar pdeng bad kumjuh ruh ïa ka sorkar jylla ha ka 28 tarik u Kyllalyngkot, 2020 hapoh ka ïingbishar Meghalaya High Court ha kaba ïadei bad ka jingpynslem ne ka jingbym siew jong ka sorkar Meghalaya ïa ka ‘Arrear’ jong ki nonghikai SSA kaba la sahteng sa kumba 8 bnai, kata naduh ka 1 tarik u Naitung, 2016 haduh ka 28 tarik u Rymphang, 2017.
Ha kaba ïadei bad ka Writ Petition, na ka liang jong ka MSSASA ha ka Sngi Palei ka 18 tarik u Jymmang, 2023, u Bah Rymbai u la pynpaw ïa ka jingsngewkmen ban pyntip sha baroh ki nonghikai ka SSA hapoh ka jylla ba ha ka 17 tarik u Jymmang 2023, na ka liang jong ka ïingbishar High Court lyngba u Honourable Justice Bah HS Thangkhiew ka la pynmih ïa ka jingbishar ha kaba ïadei bad kane ka Writ Petition kaba na ka liang ka synjuk ka la ujor.
“Ha kane ka jingbishar, na ka liang jong u Honourable Justice Bah HS Thangkhiew, lyngba ka shithi kaba la wan na ka sorkar Meghalaya lyngba u Commissioner & Secretary jong ka tnat ka pule puthi ha ka 4 tarik Ïaïong 2023, ha kaba ka sorkar jylla lyngba kane ka shithi ka la ïathuh ïa ka ïingbishar ba na ka liang jong ka sorkar jylla mynta ka la pynkhreh ïa kaba kumno ban siew dep ïa kane ka Arrear kaba sahteng jong ki nonghikai SSA kata naduh ka 1 tarik u Naitung, 2016 haduh ka 28 tarik u Rymphang 2017,” la ong u Bah Rymbai.
U Bah Rymbai u la ong ruh ba katkum kane ka jingthmu kaba la pynwandur da ka sorkar jylla lyngba ka tnat ka pule ka puthi, ka la kdew shai ba na ka liang jong ka sorkar Meghalaya kan siew ïa kane ka Arrear jong ki nonghikai SSA ha ki saw installment. Ha ka snem kaba nyngkong kaba dei jong mynta u snem, ïa ka 1st installment kan siew ha u Jylliew 2023, ka 2nd installment kan siew ha u Nohprah 2023 bad ha ka snem kaba ar, kata ka 3rd installment kan siew ha u Jylliew 2024 bad ka 4th installment kan siew ha u Nohprah 2024.
Shuh shuh katkum katei ka shithi ba la phah da ka sorkar jylla lyngba ka tnad pule puthi katkum ka 4 tarik u Ïaïong 2023, ka la kdew shai ba ha ka snem kaba nyngkong kata ha u Jylliew 2023, na ka liang jong ka sorkar kan siew ïa ka Arrear jong ki nonghikai kumba T. 1191.615 lak. Nangta ha u Nohprah, 2023 ka pisa kaba na ka liang jong ka sorkar jylla kan siew biang sha ki nonghikai SSA ka long T. 1191.615 lak. Ha ka snem kaba ar, kata ha u Jylliew 2024, ka pisa kaba na ka liang jong ka sorkar jylla kan siew sha ki nonghikai SSA ha kaba ïadei bad ka Arrear ka long T.1191.615 lak bad u bnai Nohprah 2024, ka pisa kaba na ka liang jong ka sorkar kan siew sha ki nonghikai SSA kan siew kum ka Arrear ka long T.1191.615 lak.
“Ha kane ka jingbishar kaba la pynmih da ka ïingbishar ka Meghalaya High Court hadien ba ka sorkar Meghalaya ka la mynjur ban siew ïa kane ka Arrear sha kine ki nonghikai SSA mynnin, na ka liang jong u Honourable Justice Bah HS Thangkhiew u la pynkut noh ïa kane ka case kaba na ka liang jong ka kynhun ka la ujor ha u snem 2020, ha kaba ïadei bad kane, ngi shim fa kane ka kabu ban ai khublei ï baroh ki nonghikai SSA kiba la ïasnohktilang bad ka kynhun ha kaba ïadei bad kane ka bynta ïa ka jingdawa jong ngi ba ngin ïoh ïa la ka jong ka Arrear kaba la sahteng la 8 bnai kata naduh ka 1 tarik u Naitung 2016 haduh ka 28 tarik u Rymphang 2017,” la ong u Bah Rymbai.
