Ranchi, Jymmang:
Ka nongialehkai iakob mareh Hurdles ka ri ka Jyothi Yarraji, ka la lah mynta ha ka ban khur ia ka takma Ksiar na ka jingiakob ki kynthei ha ka 100 m ha ka lympung ialehkai ba mynta ka Federation Cup Athletics.
Kumta katei ka nongialehkai ka long ruh kaba hakhliehduh ha ka rynsan khur takma ha ryngkat bad ka jinglah ban kynjoh ruh sha ka por jong ka jinglah thaw rekod da 12.89 sekhon. Ka long ruh ka nongialehkai kaba la lah ban tam ruh ia ka qualifying standard jong ka Asian Championships kaba da 13.63 sekhon ia kaba lah buh hakhmat ki nongialehkai da ka Athletics Federation of India (AFI). Hynrei ka long pat ka nongialehkai kaba lah duna ka por na ka rekod-ri ka jong ka kaba da 12.82 sekhon.
Ka khubor ka iathuh ruh ba ka R Nithya Ramraj (13.44s) bad Sapna Kumari (13.58s) ki long ki nongialehkai kiba lah wan hadien jong ka Jyothi kata ha ka jak aba-ar bad balai ha katei ka jingiakob, hynrei kiba la lah pat ban jam sha ka 2023 Asian Athletics Championships; ka lympung ialehkai ka ban sa long ha Bangkok naduh ka 12-16 tarik jong u bnai ban wan.
Na ka jingiakhun jong ki shynrang, u Tejas Ashok Shirse u lah khur ia ka takma Ksiar na ka jingiakob Hurdles 100m da kaba pyndep ha ka por 13.72 sekhon. U long ruh u rangialehkai uba la lah ban pynkhein ruh ia ka rekod barim jong u Siddhanth Thingalaya kaba da 13.65 sekhon ba u lah ioh ban thaw ha u snem 2012. Na ka jingialehkai Discus, ka Shalini Chaudhary ka lah rah ia ka nam jop napdeng ki kynthei da ka jinglah ban kawang ha ka jingjngai kaba 49.35m, katba u Damneet Singh na Punjab u lah rah ia ka jingjop napdeng ki shynrang ha ka jinglah ban kawang ha ka jingjngai kaba 64.91m.
Na ka jingialehkai kawang Sum(Javelin) ka Annu Rani ka lah khur ia ka takma Ksiar ha ka sngi ba-ar jong ka jingialehkai ha ka Federation Cup 2023 Athletics da kaba tam ruh ia ka qualification mark na bynta ka Asian Games 2022 ba lah buh da ka Athletics Federation of India (AFI), ha kaba ka Annu ka lah pynkhein ruh ia ki 56.46m ba lah buh da ka AFI; da ka jinglah jong ka ban kawang ia u Sum ha ka jingjngai kaba haduh 59.24 m. Ka long ruh ka nongialehkai kaba lah shah jied na bynta ka Asian Athletics Championships ka ban sa long ha u bnai Naitung ha Bangkok, Thailand.
Na ka jingialehkai Shot-putt ki shynrang, u lahduh Asian Games u Tajinderpal Singh Toor u lah khur ia ka takma Ksiar da ka jinglah ban kawang ha ka jingjngai kaba 20.42 m bad pynpra ruh ia ka qualifying standards na ka bynta ki ar lympung ialehkai ki ban long kata ka Asian Games bad ka Asian Athletics Championships. Nalor jong u Tajinderpal, u Sahib Singh (19.23 m), Karanveer Singh (19.05 m) ki lah wan ba-ar bad balai bad shah jiedlang ruh sha kitei ki lympung ialehkai katba ka Priya H Mohan ka paw kum ka nongjop napdeng ki kynthei ha ka jingiakob mareh 400m da ka jinglah ban pyndep ha ka por 53.40 sekhon.
Ki nongkhur takma ha ka sngi balai jong ka Federation Cup 2023 ki long:
Women’s 100m Hurdles: 1. Jyothi Yarraji (12.89s); 2. R Nithya Ramraj (13.44s); 3 Sapna Kumari (13.58s)
Women’s Discus throw: 1. Shalini Chaudhary (49.35m); 2. Paramjot Kaur (48.76m); 3. Salmi Kispotta (46.31m)
Men’s 110m Hurdles: 1. Tejas Ashok Shirse (13.72s); 2. Madhvendra Sing Shekhawat (14.01s); 3. Sachin Binu (14.23s)
Men’s Hammer throw: 1. Damneet Singh (64.91m); 2. Taranveer Singh Bains (64.81m); 3. Lokesh Poonia (57.61m).
