Shanghai, Jymmang:
Ka long kajuh ka jingjia kaba lah jia biang mynta ia ka kynhun siat Khnam ka ri, ha kaba ka lah shah weng noh mynta na ka lympung ialehkai kaba dang long ha Shanghai ka World Cup Stage1 ha ka kynhun ialehkai kaba snar bad ba tbit tam na Korea ha ka rynsan iakhun quarterfinal jong ka jingiakob siat Recurve jong ka kynhun ialehkai ki shynrang.
Kumta kata ka kynhun ialehkai jong ki shynrang ka ri kaba kynthup naduh u Dhiraj Bommadevara, Atanu Das bad Neeraj Chauhan ki mad mynta ia ka jingshah pynliem ka jong ki da 0-6 (54-55, 56-57, 54-59) ha ki kti siat Khnam ba tbit jong ki nongialehkai na Korea kiba kynthup ia u Lee Woo Seok, Kim Je Deok bad Kim Woojin. Katei ka kynhun ialehkai ka ri kaba don ha ka kyrdan ba phra jong ka kynhun siat Recurve ki shynrang, ka lah sdang ia ka jingiakhun da kaba tyngeh da 5-3 (57-57, 56-58, 57-56, 58-51) jingjop pyrshah ia ka Chinese Taipei, hynrei kaba lah shah pynjem noh ia kita ki khnap ialehkai ba khlainbor jong ka ha katei kawei pat ka kynhun ialehkai ha katei ka rynsan iakhun.
Kumjuh ruh ki thei ialehkai ka ri kiba kynthup ia ka Simranjeet Kaur, Avneet Kaur bad Ankita Bhakat kba lah ioh ia ka kyrdan ba saw ha ka jingshah jied kynhun ialehkai, kim shym la lah ban ialehkai bha tad haduh ba kin da shah weng noh na ka kylla iakhun kaba nyngkongto; ha kaba katei ka kynhun ka lah shah pynliem noh ha ka kynhun iakhun pyrshah kaba kham tlot bad kham hapoh kyrdan ha ka lympung, ka Indonesia kaba la lah ban khur shalade ia ki 1-5 (54-57, 57-57, 50-52) jingjop.
Ha ki rynsan iakhun Recurve jong ki kynhun, ki jingkyrmen jong ki kynhun ialehkai ka ri mynta ka shong ha ka kynhun ialehkai ba shijur ka ri kata ka Dhiraj Bommadevara bad Simranjeet Kaur.
