Shillong, Jymmang 18:
Ka Khasi Students’ Union (KSU) ka la dawa ïa ki nongïalam saiñ pyrthei (Politician) ka Ri-lum Khasi Jaiñtia ba ki dei ban pyrshah jur ïa ka jingthmu jong ka Sorkar MDA-2 ban sdang pyntreikam ïa ka Roster System jong ka Job Reservation Policy ka Jylla naduh ki snem ba la leit noh (1972).
“Ka KSU ka kyntu ïa baroh ki nongïalam saiñ pyrthei kiba dei ki Khasi ba ki dei ban pyrshah beit ïa ka jingpynphai dien (retrospective) ïa ka Roster System bad ban dawa ba dei ban pyntreikam beit shakhmat (prospectively),” la ong u General Secretary ka KSU samla Donald V Thabah ha ka kyrwoh khubor ba la pyllait.
Kane ka jingkyntu ka KSU ka la mih shisngi shuwa jong ka jingïalang jong baroh ki seng saiñ pyrthei ka Jylla ba la khot da ka Sorkar MDA lashai ka sngi ka 19 tarik Jymmang, ban ïatai halor ka jingpyntreikam ïa ka Roster System hapoh ka Jylla.
U samla Donald u la ong, “Ka jingmih jong ka Roster System kumba paw hi ka dei namar ka jingbthah ka High Court of Meghalaya ïa ka sorkar jylla. Hynrei kaba sngewsih pat ka long ba ka sorkar jylla haba pyntreikam ïa ka Roster System, ka la kyrtiang biang shadien da kaba wanrah ïa ka jingbym biang ka ïoh kam ki Garo katkum ka bhah 40:40 katkum ka jingujor katto katne tylli ki kynhun seng na rilum Garo, bad bsut ïa kane ha ki jingthung kam kiba mynta kiba la ktah shibun eh ïa ki samla wad kam Khasi namar ka jingïoh bhah ki Khasi mynta kam dei shuh 40%, hynrei ka la hiar shuh shuh”.
Une u nongïalam ka KSU u la ong, “Hooid lada kheiñ wat na ka ‘population ratio’ ruh ka bhah 40:40 ka la pynduh nong bha ïa u Khasi namar ka jaidbynriew Khasi ka kham heh paid ban ïa ka jaidbynriew Garo, hynrei ka jingkyrtiang dien (retrospective) ïa ka roster system ka la buh jingeh arshah ïa ki samla Khasi ba mynta namar kim ïoh pura shuh wat tang ïa ka bhah 40%.”
U samla Donald u la ong, “Lada ka Sorkar ka sngew ba ka jingphaidien ïa ka Roster System ka dei na ka bynta ban pyndap ïa ka jingduhnong ki Garo naduh u snem 1972, kane ka long pat kum ka jingpynshitom, jingpynsaja bad jingtei pop ïa ki samla Khasi kiba wad kam mynta”.
“Tang namar ba phi sngew ba kiba mynshwa ki la bakla ym dei pat ban pynshitom (punish) ïa ki samla Khasi mynta kiba lui-lui, ki bym don bynta eiei ha ki jingjia ba mynshwa hynrei kiba kwah tang ban ïoh ïa la ka hok ka bhah ha ki kam Sorkar,” u la ong.
Halor kine kiei kiei baroh, ka KSU ka la dawa jur ïa ka Sorkar Jylla ba ïa ka Roster System dei ban pyntreikam shakhmat naduh ba la pynmih ïa ka bad ym ban phai shadien kaba long kum ka jingïohnong ïa kawei ka jaidbynriew bad ka jingduhnong kaba khraw ïa kawei pat ka jaidbynriew.
