Rome, Jymmang:
Ka jingiaknieh rung sha ka jingiakhun semifinal ha ka lympung ialehkai Tennis ba mynta ka Italian Open ka iathuh ba na ka jingialehkai jong ki kynthei, ka Elena Rybakina ka lah jam mynta sha katei ka rynsan iakhun hadien ba ka nongiakhun pyrshah bad kaba dang iai bat ia ka kyrdan ba nyngkong ha ka pyrthei ka Iga Swiatek na Poland ka lah hap ban shongthait noh na ka jing-ialehkai na ka daw jong ka jingshitom kynsan ka kjat kamon.
Ka Elena kaba dang iai bat haduh mynta kum ka nongjop ha ka Wimbledon ka lah jam mynta ha ka sien kaba nyngkongeh sha katei ka rynsan iakhun jong ka Women’s Tennis Association (WTA) 1000. Ka Swiatek ka lah hap ba shim ia katei ka sienjam ha ryngkat bad ka jing-ialehkai hapdeng ki arngut ka long da 2-6, 7-6(3), 2-2. Kumta ka Elena Rybakina ka long mynta da 3-2 jingjop pyrshah ia ka Iga hadien ka jingjop jong ka ia katei ka lahduh WTA ha ka Australian Open bad Indian Wells ruh kumjuh dangshen. Ka long ruh ka sien kaba lai jong katei ka nongialehkai ban jam sha ka jingiakhun semifinal jong ka WTA 1000 ha ka aiom ialehkai ba mynta.
Katei ka lahduh ha ka pyrthei ka mad ruh mynta ia ka jingkut noh ki 14 jingialehkai jingjop ba ka lah iai khur baroh shi katta ha katei ka lympung ialehkai. Hadien katei ka jingjop da ka Elena Rybakina, ka khubor ka iathuh ba katei ka nongialehkai kan iakynduh pat sa bad ka Jelena Ostapenko ha katei ka rynsan iakhun na bynta ka jingiaknieh jaka jong ki sha ka phainal. Ka Jelena kaba lah ialehkai ha ka sien kaba lai jong ka jingiakhun quarterfinal ha ka tei ka lympung, ka la lah ban pynliem noh ia ka Paula Badosa na ka bynta ban jam sha ka jingiakhun semifinal ha ka sien kaba nyngkong hadien ba ka lah ban khur noh shalade ia ki 6-2, 4-6, 6-3. Ha kawei pat ka jingiakhun ki kynthei, ka Veronika ka la lah ban pynliem noh ia ka Zheng Qinwen da 3-6, 6-3, 6-4 na ka bynta ban jam sha ka sien kaba ar jong katei jingiakhun semifinal.
