Rome, Jymmang:
Ka jingiaid lynti jong u khlur ialehkai Tennis ka ri Serbia uba bat mynta ia ka kyrdan ba 1 ha ka pyrthei u Novak Djokovic ha ka Italian Open kaba mynta kam shym shym la long kaba seisoh kumba u lah khmih lynti, ha kaba utei u rangialehkai u lah mad noh ia ka jingshah weng syndon na ka lympung iakhun na ka jingshah pynrem ka jong u ha u Holger Rune;uba la lah ban khur shalade ia ki 6-2, 4-6, 6-2 jingjop jong ka jingiakhun quarter-final ka jong ki.
Shuh shuh ruh u Djokovic u mad mynta ia ka jingshah pynrem ha ka sien kaba ar ha utei u rangialehkai ba dangkhie, naba ka sien kaba nyngkong kaba u Rune u la lah ban pynliem noh ia u Novak ka long ha ka Masters 1000 ha Paris Bercy ha u bnai Naiwieng jong u snem ba lah dep. Kumta ka jingiakhun kaba dang thymmai hapdeng ki arngut ka lah poi sha ka jingiapynphai ktien bad u nongpyniaid ia ka jingialehkai (Chair Umpire) na kitei ki arngut ki nongialehkai. Kumta ia ka jingiakhun ka jong ki lah hap ban pynsangeh noh haduh kumba shi kynta na ka daw jong u slap. Ka long ruh ka sien kaba 17 ha kaba u Novak Djokovic u lah ioh ban iakhun ha ka rynsan iakhun quarterfinal jong katei ka lympung ialehkai ha Rome, ha kaba mynta u bat halade ia ki 13-4 jingjop bad u Tomas Berdych u long u rangialehkai ba khatduh ha ka ban lah pynliem noh ia u ha katei karynsan iakhun jong katei ka lympung ialehkai kata ha u snem 2013.
Kumta ruh ka rekod jong u Novak ha katei ka lympung ialehkai ka lah hiar mynta sha ka 67-11; naba utei u rangialehkai u iakhun na ka bynta ban khur pat ia ka nam jop kaba hynniew hynrei uba lah shah pynkut noh ka jingiaid lynti ha ka lympung hadien ki ar kynta ia aireng ha ryngkat bad ki 35 tylli ki unforced errors ha ka jingshah rem kaba saw ka jong u ha ka aiom ialehkai ba mynta. Ka khubor ka iathuh ruh ba hadien katei ka jingjop, u Rune u lah ruh ban iakynduh bad u Casper Ruud ne bad u nongialehkai na Argentina u Francisco Cerundolo ha ka jingiakhun semifinal ha katei ka lympung.
