Bogot, Jymmang:
Katkum ki khubor la ong ba ka long kaba sngewphylla ban lap ia kitei ki 4 ngut ki khynnah rit, kynthup ia i khyllung ba dang 11 bnai, ba kin dang lait im na ka jingleit hap bakla ka liengsuiñ ha ka khlaw Colombia ha Amazon naduh ki 2 taiew ba la leit.
Kumta u President ka Columbia, u Gustavo Petro ha katei ka sngi, u la ong ba katei ka khubor ka long ka jingkmen ia ka ri baroh kawei namar ka jinglait im jong kitei ki khyllung- khynnah na katei ka jingjia ba sngewsih ba katei ka liengsuiñ ka leit hap bakla ha ka por ba kam pat dei ban leit hiar.
U Petro u la iathuh ba ia kitei ki khynnah baroh la lap hadien ka jingtrei shitom bad ka jingiakhun shitom jong ki bor pahara bad ki shipai jong katei ka thaiñ hadien ba la ioh jingtip halor ka jinghap jong katei ka liengsuiñ.
La ong ba ki bor pyniaid jong ka Columbia ki la phah palat 100 ngut ki shipai ha ryngkat bad ki ksew bud dien, naka bynta ban leit wad ia kitei ki khynnah kiba shong ha katei ka liengsuiñ ha katei ka por ba katei ka liengsuiñ ka la leit hap bakla ha ka 1 tarik u Jymmang, ha kaba u nongñiah ‘Pilot’ bad ka kmie jong kitei ki khynnah, ki la khlad noh syndon.
