Shillong, Jymmang 18:
Ka seng Hynñiewtrep Integrated Territorial Organization (HITO) kan leit ban synran ïa ka seng Voice of the People Party (VPP) ha ka Sngi Thohdieng sha Secretariat kum shi bynta ban pynpaw ïa ka jingdawa ban pynbeit ïa ka bhah thung kam thung jam lane ka Reservation Policy, bad ban sngap kaei ka rai ka ban mih na ka jingïalang kaba ka sorkar ka la khot bad baroh ki seng saiñpyrthei kiba don ha jylla.
Ka khubor na ka HITO ka la pyntip ba naduh ba sdang, ka seng ka la ïeng halor ka nongrim ba ka Reservation Policy kaba naduh u snem 1972 ka dei kaba noh shiliang bad ka seng ka la dep pynsngew ba ka Reservation Policy ka dei ka daw katba ka Roster System ka dei kaba mih bad kaba ktah na kane ka Policy.
Lashai ka sngi, u Myntri Rangbah, Conrad K Sangma, un shong jingïalang bad ki seng saiñpyrthei ban batai sha ki halor ka Roster System. Kane ka jingïalang kan dei kaba lai hadien ka jingïakynduh jong ka kynhun Myntri ha ka Sngi Balang bad ka jingïalang bad ki MLA kiba don ha ka sorkar Meghalaya Democratic Alliance (MDA) ha ka Sngi Palei. Ha kine ki jingïalang, u Conrad u la ong ba la batai halor ka jingpyntreikam ïa ka Roster System.
Lah ban kdew ba na ka liang ka VPP ka la dawa ba ka sorkar ka dei ban pynsangeh shwa ïa ka jingthung kam thung jam katba kam pat peit bniah ïa ka Reservation Policy. Hynrei na ka liang u Conrad u la dep kren shai ba ha ka jingïalang ka ban long lashai, yn ïakren beit tang halor ka Roster System bad ha kajuh ka por, u la ong ba ka jingthung kam ka dei ka kam kaba ïaid beit.
