Shillong, Jymmang:
Kan long ka sien kaba nyngkong eh hapoh ka thaiñ Shatei Lam Mihngi ba ka Bhaichung Bhutia Football Schools ha ryngkat ka jingïatrei lang bad ka Dream Foundation ka la phaikhmat sha kane ka nongbah Shillong ban plie ïa ka shlem ai jinghikai phutbol.
Ka Bhaichung Bhutia Football School kaba la seng da u khlur ïalehkai phutbol barim jong ka ri (Bhaichung Bhutia), ka la ïateh lok bad ka Assam Rifles na ka bynta ban plie ïa katei ka shlem ai jinghikai phutbol khnang ban kan lah saiñ dur ïa ka lawei jong ki khynnah kiba dangkhie dangsan ha ka kam ïalehkai.
“Kane ka long ka sien kaba nyngkong eh ban plie ïa ka shlem ai jinghikai ha ka thaiñ Shatei Lam Mihngi namar ka Meghalaya ka long kaba paw bha ha ka kam ïalehkai phutbol nalor ka Manipur bad Mizoram,” la pynpaw u Bhaichung Bhutia ha ka jingïalang kaba la long ha Indoor Sports Hall jong ka SAI Training Centre.
Ha kane ka sngi la ïadon lang u Myntri Rangbah ka Jylla u Conrad K. Sangma kumjuh ki ophisar na ka tnat ïalehkai kynthup ïa ka Director Kong Isawanda Laloo, ki ophisar bad coach ka SAI Training Centre, ki nongmihkhmat ka Dream Foundation bad kiwei.
U la ong ba ka jingwanrah ïa kane ka shlem ai jinghikai sha kane ka nongbah Shillong ka dei namar ba kiba bun na ki khynnah kiba paw ha ka kam ïalehkai phutbol ki dei na Manipur, Meghalaya bad Mizoram.
U la ong ruh ba ki don haduh 6 ngut ki khynnah ïalehkai na Meghalaya kiba la ïoh ïa ka bai bam (scholarship) na ka Bhaichung Bhutia Football Club ha kaba ki la shah jied ban don ha ka prokram kilanmet jong ka ri, katba 2 ngut kin ïoh ban mihkhmat ïa ka ri.
U la pynshlur ïa ki khynnah ban kin ïasoh sha kane ka shlem ai jinghikai ha Assam Rifles khnang ba ki lah ban ïaid ryngkat ha ka kam ïalehkai bad kumjuh ha ka pule puthi bad ba kin kiew shaphrang ha baroh arliang.
Ha kawei pat ka liang u Conrad u la ong ba lyngba kane ka shlem ai jinghikai kin dang mih shuh shuh ki rangïalehkai phutbol kiba kynsai na ka thaiñ Shatei Lam Mihngi bad kiba lah ban paw ym tang ha ri India, hynrei wat shabar ri ruh kumjuh.
“Ngi khmih lynti lyngba kane ka shlem ai jinghikai kan long ka jingïarap ban nang sei ïa ki rangïalehkai ba kynsai ki ban paw hapoh ka ri bad khmih lynti ruh ba shisien ka sngi ka ri India kan ïoh rung ha ka World Cup,” u la bynrap.
