Shillong, Jymmang:
Ka Manchester City ka la nangjan ban rah ïa ka nam lahduh hadien ba ka la lah ban khanglad ïa ka Real Madrid bad ban jam sha ka final ha ka sien kaba ar ha ka Champions League.
Ha kane ka jingïakhun semi final (2nd leg) kaba la long ha ka sngi Thohdieng, ka City ka la lah ban pynliem ïa katei ka lahduh jong ka aïom ba la lah da 4-0 kol na ka bynta ban tam da 5-1 lyngba ka aggregate bad kane ka long kum ka kput jong kane kynhun u Pep Guardiola halor ka jingshah rem ha ka Madrid ha ki 12 bnai mynshwa.
Ka City ka dei ka kynhun kaba ju ïalehkai bha naduh ba la shimti da ki trai kiba na Abu-Dhabi ha u snem 2008 hadien ba ki la pynlut da ki billion na ka bynta kane ka klob.
Lyngba ka jingjop, ka City kan ïakhun final pyrshah ïa ka Inter Milan ha Istanbul ha u bnai ban wan bad kan long ruh ka jingïaknieh jong kane ka kynhun ban rah ïa ka Premier League, FA Cup bad ka Champions League na ka bynta ban ïaryngkat kyrdan kum ka Manchester United kaba la lah ban pynurlong ha ka aïom ïalehkai 1998-99.
Ban pynurlong na ka bynta ban khur ïa ka nam lahduh kaba san ha ki hynriew tylli ki aïom ïalehkai, ka City ka donkam ïa ki lai point na ki lai tylli ki jingïakhun kiba dangsah jong ka Premier League.
Ka United ka donkam ban ïakhun tyngeh ha ka jingïalehkai derby jong ki ar tylli ki klob na Manchester ki ban ïakhun ïa ka final ha ka FA Cup ka ban long ha ka 3 tarik u Jylliew.
Hynrei ka City ka la long ka kynhun kaba bat ïa ka kyrdan ba hakhlieh hadien ba ka la lah ban pynlong ïa katei ka kynhun ba khlaiñ bor na Spain ha ka Champions League.
Haba sha kane ka jingïakhun jong ka wat kaba ar, ka City ka la lah ban ïalehkai ha la ïing. Watla ki khlur ïalehkai ba kynthup ïa u Erling Haaland bad u Kevin De Bruyne kim shym la lah ban thep kol, hynrei u Bernardo Silva u la ïoh ban thep ar kol ha ka minit kaba 23 & 37.
Ha ka kylla miet ka City ka la ïoh ban thep kol biang lyngba u Manuel Akanji ha ka minit kaba 76 bad hashwa ban wai ka la thep biang sa shi kol lyngba u Julian Albarez ha ka minit kaba 90+1 na ka bynta ban khur syndon ïa ka jingjop.
