Shillong, Jymmang 18:
U Symbud Myntri Rangbah ka jylla, u Bah Sniawbhalang Dhar uba khmih ruh ïa ka tnat Patok u la ong ba ka Sorkar Jylla ka la rai ban pynkynriah noh ïa ka Shillong District Jail sha New Shillong Township.
Kane ka jingpyntip na u Symbud Myntri Rangbah ka Jylla ka la long ruh ha ka sngi Palei hadien ba u la hiar jurip da lade ïa ka jinglong jingman jong ka Shillong District Jail.
Haba kren sha ki lad pathai khubor, u Bah Sniawbhalang u la pyntip ba ka Sorkar ka la dep shim rai ban pynkynriah noh ïa ka Shillong District Jail sha New Shillong Township da kaba ong “Ka por ka la dei ban pynkynriah noh ïa kine kiei kiei (jingtei ka Sorkar) sha khapsor”.
Haba kylli halor ka jingïaid ka kam ba ïadei bad ka jingtei ïa ka Central Jail, u Symbud Myntri Rangbah u la ong, “Kane ka dei ka kam ba ïaid mynta. Ngi la rai ban kynriah noh ïa ka Shillong District Jail”.
Lah ban kdew hangne ba ka Sorkar Jylla dang shen, ka la rai ban tei noh la ka jong ka Central Jail ha New Shillong Township. Kane ka long ban pyllait ïa ki District Jail na ka jingkhapngiah ïa ki koidi kiba shah set.
Kumba long mynta, jan baroh ki District Jail ka Jylla ki don hapdeng ka jingeh kaba khraw namar ka jingkhapngiah ha ka jingdon ki koidi.
Ha kajuh ka por u Myntri u la pyntip ba ka tnat Patok ka la ïoh ïa ka jaka kaba heh kumba 25 akar ha New Shillong na ka tnat Pynroi Sor (Urban Affairs) bad mynta ka tnat ka ap ïa ka jingaiti ïa ka jaka ban sdang tei noh ïa kane ka phatok ba thymmai.
“Hadien ba ngi la ïoh ïa ka jaka, ngin sa tei ïa ka patok ba thymmai bad ngin sa sdang ïa ka jingpynkynriah ïa ki koidi na ka Shillong District Jail,” u la ong haba pyntip ba kane ka patok ba thymmai kan dei kaba lah ban set haduh 1000 ngut ki koidi.
Ha kane ka sngi u Bah Sniawbhalang uba khmih ruh ïa ka tnat Transport u la leit jurip ïa ka jingtei jong ka Shopping Complex bad ka jaka pynïeng kali ha ka jaka jong ka MTC ba don ha Khyndailad.
Ïa u Symbud Myntri Rangbah ha kane ka sngi la synran lang da u MLA ka Jowai u Bah Wailadmiki Shylla, u CEO ka Municipal, ki Kontraktor lem bad kiwei kiwei.
