Nongstoiñ, Jymmang 18:
Ka ïingkashari jong u Special Judge (POCSO), Nongstoiñ ka la rai pynrem da kaba set patok haduh 25 snem kynthih ryngkat ka kuna ba T.50,000/- (Sanphew hajar) pyrshah ïa uwei u runar ba la tip kyrteng kum u Bringstarwell Kharbani halor ka jingdonkti ban batbor haduh ban da armet ïa kawei ka khynnah ba dang 13 snem ka rta kaba la jia naduh u snem 2020.
Ka kyrwoh khubor na u Superintendent of Police ka West Khasi Hills la ong ba ha ka 23-07-2020, ki pulit ki la ïoh pdiang ïa ka ejahar halor ka jingshah thombor jong katei ka heprit ba dang 13 snem ha kaba ki la pynrung kyrteng ruh ïa ka mukotduma pyrshah ïa utei u nongleh kam sniew kaba katkum ka vide Nongstoiñ P.S. Case No.31(7) 2020 hapoh ka kyndon 5(n)/6 POCSO Act bad la bynshet ruh ha i WPSI DP Nongbri ba kan shimti ban tohkit bniah ïa katei ka kam.
Shuh shuh la pynpaw ruh ba na ka liang ki pulit ki la pynngat ïa utei u runar hapoh ka kyndon 506 IPC r/w Section 5(j)(ii)(1)(n)/6 POCSO Act.
Ka khubor na u SP ka West Khasi Hills ka pynpaw ruh ba halor katei ka jingjia, ha ka 11-05-2023, ka ïingkashari jong u Special Judge (POCSO), Nongstoiñ haba ai jingithuh ïa ki sakhi ba la ïoh lyngba ka jingtohkit, ka la pynksan ïa ka mukotduma pyrshah ïa utei u runar. Nangta ka la pynngat ïa utei u runar ha kitei ki kyndon ba pyrkhing da kaba phah set patok haduh 25 snem ryngkat ka kuna T.50,000 na ka bynta ka jingpynkheiñ kyndon kaba hap hapoh ka kyndon 6 jong ka POCSO Act bad ka kyndon 506 jong ka IPC.
Nalor kata, la pynpaw ruh ba ka ïingkashari ka la pynngat ruh ïa utei u runar ba un shong patok biang sa 1 snem kynthih (simple imprisonment) ryngkat ka kuna T.1000/-(Shihajar).
