Guwahati, Jymmang:
Khyndiat sngi hadien ba ki nongmihkhmat jong ka seng saiñ pyrthei All India United Democratic Front (AIUDF) hapoh ka jingïalam jong u Badruddin Ajmal ki la leit ban ïakynduh ïa u Myntri Rangbah jong ka Bihar – Nitish Kumar ha nongbah Patna; na ka liang u general secretary jong ka AIUDF – Aminul Islam ha ka 14 tarik mynta u bnai u la leit ban pynlong ïa ka jingïalang bad ki lad pathai khubor ha ka nongbah Guwahati.
Ha ka jingïalang bad ki lad pathai khubor, na ka liang u Aminul Islam u la pyntip ba hadien ba u Myntri Rangbah ka Bihar u la ïawer ïa ki nongïalam jong ka AIUDF ban wan jngoh ïa ka jylla Bihar – ki la don 4 ngut ki nongïalam jong ka AIUDF kiba la leit ban ïakynduh ïa u Myntri Rangbah ha Patna. Na ka liang u Aminul u la pyntip ba ha katei ka jingleit ïakynduh ïa u Myntri Rangbah ka Bihar ka la don ka jingïakren ïasyllok halor ki mat kiba ïadei bad ki sienjam kumno ban pynsangeh ïa ka BJP bad kumjuh ruh halor ki lad ki lynti ban ïatreilang bad ki seng riewlum bad kiwei kiwei ki seng saiñ pyrthei kiba don ïa kajuh ka thong.
Ha ka jingïakren bad ki lad pathai khubor, na ka liang u Aminul u la pyntip shuh shuh ba ki nongïalam jong ka AIUDF ki la leit ruh ban ïakynduh ïa u nongïalam ka RJD – Lalu Prasad Yadav bad kumjuh ruh ïa u Symbud Myntri Rangbah jong ka jylla Bihar – Tejashwi Yadav.
U Aminul u la pyntip shuh shuh ba ka mat treikam kaba hakhmat eh ka long ban pynkhyllem ïa ka BJP na ka bor synshar. U la pyntip shuh shuh ba na ka liang ka seng kan pynïakhun ïa ki kyrtong na man la ki thaiñ pyrshah ïa ki kyrtong jong ka seng BJP.
Ha ka jingïalang, na ka liang u Aminul Islam u la pyntip shuh shuh ba um don ïa kano kano ka jingtip kaba tikna ba balei ka seng Congress ha ka jylla Assam ka la pyndkut noh ïa ka jingïadei paralok bad ka AIUDF. U la pyntip ba ka seng Congress ka la kynnoh ba ka AIUDF ka la donkti ha ka ‘cross voting’ ha ka ilekshon Rajya Sabha jong ka jylla Assam. U la pyntip shuh shuh ba mynta ka seng Congress ka la shim ïa ki lad ki lynti ban leit ïalang paralok bad ki seng saiñ pyrthei kiba rit bad kiba dang thymmai – kiba dei ruh ki seng ki bym pat shym la ïoh mad satia ïa ka jingjop ha kino kino ki ilekshon.
Kat kum ki jingïoh lum jingtip la ïathuh ba dei ha ka sngi Thohdieng kaba la dep ba ki nongïalam jong ka AIUDF ki la leit ban ïakynduh ïa u Myntri Rangbah jong ka Bihar – Nitish Kumar ban ïasyllok halor ki mat kiba ïadei bad ki kam saiñ hima sima jong ka jylla Assam bad kiwei kiwei ki jingeh kiba ïadei ha ki kam saiñ hima sima.
Ki nongïalam jong ka AIUDF kiba la leit ban ïakynduh ïa u Myntri Rangbah ka Bihar ki kynthup ïa u Badruddin Ajmal, MLA ka Mankachar – Aminul Islam, MLA ka Sonai – Karim Uddin Barbhuiya bad u MLA ka Dhubri – Nazrul Haque.
Kat kum ki jingïoh lum jingtip la ïathuh ba hadien katei ka jingïalang la antad ba ka AIUDF kan sa don ha ka kynhun ka ban pyrshah ïa ka seng BJP na ka bynta ka ilekshon Lok Sabha ka ban sa long ha u snem 2024.
