Nongstoiñ, Jymmang 18:
Ki paidbah na ki khatphra tylli ki shnong ha ka thaiñ Rambrai, West Khasi Hills ha ryngkat ka jingsynran lang ka FKJGP, KSU, Rambrai Circle, KSU West Khasi Hill District hadien ka jingpan por lai sngi jong ki nongap jong ka jaka ksam mar poh khyndew ha Mawlangria kaba don hajan Mawiawtep jong ka thaiñ Rambrai, ki la sangeh noh ïa ka jingthmu ban leit pynsangeh ïa ka jaka ksam mar poh khyndew ha Mawlangria. Hynrei, ki la maham ba lada ha kine ki lai sngi, ki bor district kim lah ban pynsangeh mardor lada jia eiei kin hap ban shim jingkitkhlieh.
Katei ka jingthmu leit pynsangeh jong ki nongshong shnong ïa katei ka jaka ksam ïa u mar poh khyndew ‘iron ore’ ka dei hadien ba ki la dep ban pynlong ïa ka jingïalang ha ka sngi Palei ha Mawthaw.
Shuh shuh na ka liang ki nongshong shnong bad ki nongkitkam jong kitei seng ki la pynrem jur ïa ki bor district ba kim lah ban pynsangeh wat haba ki nongshong shnong ki la dawa ban pynsangeh mardor kat bym pat lah ban ai ïa ka jingpynshai paidbah lane ka hearing, shwa ban leh ïa kino kino ki jingksam mar poh khyndew.
Ha kajuh ka por ki la pynrem jur ruh ïa u Syiem ka Hima Rambrai ba u la shu ai NOC khlem da pyrkhat ïa ki paidbah ba bun ba lang ba shah ktah lyngba ka jingksam marpoh khyndew.
Ki la ong ruh ba katkum kum ka jingïohi ki paidbah nongshong shnong ki don katto katne kiba leit ban ïatreilang sop-sop tang ban myntoi shimet ban leit long pynban ki nongap ha katei ka jingtih marpoh khyndew, wat lada ka ktah ïa ka ïap ka im jong ki paidbah kiba ap umbam umdih na ki tyllong um kiba tan na katei ka jaka.
