Shillong, Jymmang 18:
Ka Federation of Khasi Jaiñtia & Garo People (FKJGP) Sengkmie ka la kyntu ïa ki seng saiñ pyrthei ka Jylla ba kim dei ban shah ïa ka Sorkar Jylla ba kan pyntreikam ïa ka ‘Roster System’ da kaba kyrtiang dien sha ki 50 snem ba la leit noh haba pynsngew ruh ba dei ban pynbiang tarajur noh ïa ka jingaibhah ha ka State Reservation Policy katkum ka jingdon paid.
Kane ka jingpynpaw ka FKJGP ka la mih shisngi shuwa ba ki seng saiñ pyrthei baroh kin leit ïashim bynta ha ka jingïalang ba la khot da ka Sorkar Meghalaya Democratic Alliance (MDA)-2 ban ïatai halor ka jingpyntreikam ïa ka Roster System jong ka Job Reservation Policy ka Jylla, ka ban long lashai ka sngi Thohdieng, ka 19 tarik Jymmang.
Ha ka kyrwoh khubor ba la pyllait da u Vice President ka FKJGP u samla Kitboklang Nongphlang u la ong, “Kum ka seng ba la shakri mynta la palat 33 snem, ngi dap da ka jingbynñiaw ban ïohi ïa ka jingpyrshang jong ka Sorkar ban kyrtiang dien naduh u snem 1972 haba pyntreikam ïa ka Roster System, kaba mih na ka jingbthah jong ka ïingkashari Meghalaya High Court.”
Kumta ka FKJGP ka kyntu ïa baroh ki seng saiñ pyrthei ka Jylla ba kim dei shuh ban kyrtiang dien ïa ki 50 snem ba la leit noh, hynrei ban saiñdur thymmai ïa ki snem ki ban sa wan lada ki don shisha ïa ka jingkitkhlieh bad ka jingïohi jngai.
“Ngi kyntu ruh ïa kiba leit ïashim bynta ba kin shim ïa ka jingkitkhlieh ba ka tarajur ha ka jingai bhah, kam dei satia ban noh shiliang,” la ong utei u nongïalam bad bynrap, “Ka FKJGP ka dawa na ka Sorkar MDA ban pynbeit thymmai noh ïa ka State Reservation Policy khnang ba ka jingai bhah kan long katkum ka jingbun paid (population ratio)”.
Shuh shuh u la ong ba ka Sorkar ka dei ban pyntreikam ïa ka Roster System shakhmat naduh ba pynmih ïa ka hukum lane katkum ka jingbthah jong ka ïingkashari Meghalaya High Court ym ban phai dien trai.
