Guwahati, Jymmang:
U Director General of Police (DGP) jong ka jylla Assam, u GP Singh ha ka 16 tarik mynta u bnai u la pyntip ba ïa ka mokotduma kaba ïadei bad ka jingkhlad jong kawei ka pulit SI (Junmoni Rabha) la aiti ha ka tnat Criminal Investigation Department (CID), Assam ba kan pynlong ïa ki jingtohkit kiba bniah.
Ha ka jingpyllait kyrwoh jong u DGP u la pynbna ba kum shi bynta ban pynlong ïa ka jingtohkit kaba bniah halor ka mokotduma FIR Nu 0183/2023 bad halor ka jingkhlad jong ka pulit SI – Junmoni Rabha, la rai ban aiti ïa ki kam tohkit ha ki bor pulit ka tnat CID jong ka jylla.
U heh pulit u la pyntip ba ïa ka FIR Nu 0183/2023 la pynrung ha ka 15 tarik u Jymmang, 2023 ha North Lakhimpur PS hapoh ka kyndon 120-B, 395, 397, 342, 387. U la pyntip ruh ba na ka liang ki bor pulit ka thaiñ Lakhimpur bad Nagaon ki la shim ïa ki sienjam ban leit pynrung ïa ka mokotduma kaba ïadei bad ka jingkhlad jong katei ka pulit.
Haba phai sha kawei pat ka mat, la ïathuh ba na ka liang ki bahaïing hasem jong ka Junmoni Rabha ki la kynnoh ba ka don kaei kaei kaba sha lyndet kaba la wanrah ïa ka jingkhlad jong ka Junmoni.
Na ka liang ki bahaïing hasem ki la kyntait ban pdiang ba ka jingkhlad jong ka Junmoni kan dei na ka jingjia ïatakhuh kali bad ong ruh ba ka jingkhlad jong ka Junmoni ka dei ka kam bymman kaba la pynkhreh bad pyndep da no re da no.
Kat kum ki jingïoh lum khubor la ïathuh ba ha ka step phyrngab jong ka 16 tarik mynta u bnai, ka kali ba la ñiah da ka Junmoni Rabha ka la ïa takhuh bad kawei ka trok ha ka thaiñ Jakhalabanda, Nagaon district, Assam.
Ka Junmoni Rabha, kaba trei ïa ki kam ki jam jong ka ha Morikolong police out-post, Nagaon district ka la khlad hashen na katei ka jingjia.
Hadien katei ka jingjia, la ïathuh ba na ka liang ka kynhun pulit ka la leit mar mar sha katei ka jaka badn lum jingtip khang ban pynsdang ïa ki kam tohkit kiba sah.
Na ka liang ki bor pulit ki la leit ruh ban rah ïa ka met jong ka Junmoni Rabha sha Kaliabor sub-division civil hospital, hynrei na ka liang ki doktor ki la pynbna ba ka Junmoni ka la khlad noh hashwa ban ïoh ïa ki lad jingsumar.
Kat kum ki jingïoh lum khubor la ïathuh ba ka jingjia ïatakhuh kali ka la jia ha ka por ba ka Junmoni Rabha ka dang don ha ka lynti ban leit sha ki bynta ba shatei jong ka jylla Assam.
