England, Jymmang:
U rang shut bol ba tbit jong ka klob Brentford bad kumjuh ka England u Ivan Toney, u la shah khang mynta ban shimbynta ha kino kino ki jingialehkai phutbol haduh 8 bnai kynthih lem bad ka jingshah dain kuna kaba haduh 50,000 pounds ($63,000). Kane ka long hadien ba u la pdiang ia ki kyndon jingpynshitom halor ki 232 sien jingpynkhein kyndon jong ka Football Association’s (FA) kiba long pyrshah ia ka kam iathong-pisa ha ki jingialehkai.
Kumta utei u rangialehkai un nym lah ban ialehkai na ka klob kaba u mihkhmat ne ka England haduh ka 16 tarik u K’lyngkot 2024 bad uba lah shah maham ruh lada u pynkhein ia katei ka jingshah pynshitom kaba lah ruh ban lam ia u shaduh u pud jong ka jingduh ialehkai syndon ha ka pateng ka ban dang wan. Ia katei ka jingpynshitom pyrshah ia u lah ai jingbit da ka Independent Regulatory Commission hadien ba ka lah dep ban pynlong ia ka jingkhot hajir. Shuh shuh ruh ka khubor ka iathuh ba utei u rang-ialehkai u lah shah pynngat kyndon ha ka FA ha u bnai Naiwieng halor ka jingdonktilang ka jong u ha ka ban pynkhein ia ki kyndon-ain haduh 232 sien hapdeng jong u snem 2017 bad 2021 bad uba lah shah pynngat ruh ha ryngkat bad 30 sien shuh shuh ka jingpynshitom ha u bna Nohprah. Hynrei ha kajuh ka por ruh na ka liang jong ka FA ka lah weng noh ia kita ki 30 sien jong kita ki jingpynkhein kyndon bad uba lah pdiang ruh ban iaisah da 232. U Toney u lah ruh ban leitphai sha ka ktem ai jinghikai na ka bynta ki saw bnai ba khatduh jong ka jingshah sospon ialehkai ka jong u ka ban sdang naduh ka 17 tarik u Nailur 2023.
Kum u rangialehkai bat bit jong kitei ki ar kynhun ialehkai, u Toney u la la ban khyrwit 20 kol ha ki 33 tylli ki jingialehkai na bynta ka klob Brentford ha ka aiom ialehkai ba mynta, kiba lah iarap ruh ia ka kynhun baroh kawei ban jam sha ka kyrdan ba 9 ha ka thup khein dor-thong jong ka EPL. Kumta ruh utei u rangialehkai un duh ruh ban shimbynta ha ka jingiakhun mynta ka sngi (Saitjain) jong ka klob pyrshah ia ka Tottenham Hotspur bad ruh ia ka jingialehkai ba khatduh jong ka aiom ialehkai ba mynta ba ka kynhun kan iakhun ha-iing pyrshah ia ka Manchester City ha ka 28 tarik mynta u bnai.
