Shillong, Jymmang 19:
Ka nongïalam ka National People’s Party (NPP) bad Myntri ka Sorkar Jylla, ka Dr. M. Ampareen Lyngdoh ka la buh jingkylli ïa ki MLA ka Voice of the People Party (VPP) halor ka jingbym wan ïashim bynta jong ki sha ka jingïalang ki seng saiñ pyrthei ba la khot da ka Sorkar ha ka Sngi Thohdieng.
“Ym don kawei ruh ka seng kaba mih, mih tang kawei. Nalor kata kiba don sha surok pat kim wan sha ka jingïalang wat la ki dei ma ki kiba ïalam ïa ka seng,” la ong ka Dr. Lyngdoh haba kren sha ki lad pathai khubor ha ophis treikam ka seng.
Haba kdew ba kum ki nongïalam kim dei ban leh kumtei naba katei ka dei ka kam ïap kam im jong ka jaidbynriew, ka Myntri ka la wer ïa ki ban wan shakhmat ban ïakren bad ban ai jingmut halor ka ‘Roster System’ namar ka Sorkar kam kwah ban shim kano-kano ka rai khlem ka jingïasngewthuh lang.
“Barabor hi ruh kane ka jingïakhana jong ngi ka dei na ka daw jong ka ‘Roster System’, la bthah da ka ïingbishar ban pynbiang ïa ka ‘Roster System’, ym don ajenda da kawei,” ka la ong da kaba bynrap, “Phim lah ban kren ïa kiwei pat ki mat.”
Ha kajuh ka por, ka la pynsngew ba don ki seng saiñ pyrthei kiba kylli buh jingkylli halor kine-kitai bad ka Sorkar ka la shim ïa ki jingai jingmut kumjuh ki jingkylli khnang ban pynbit-pynbiang da kaba shong bad ki ophisar lem bad ki stad aiñ ban jubab halor kitei ki bynta.
Haba pynsngew ba ïa ka rai hap ban shim ha ka jaka kaba dei, ka Myntri ka la ong, “Phim lah ban ong ba ngin rai ha surok, ha lynti-syngkien…ngi la ai ïa phi kata ka lad, ka kabu ksiar ba phin wan.”
Halor ka komiti ba la thaw da ka Sorkar, ka la ong, “Ngin sa pyrkhat ïoh dang donkam shuh nalor kita ki seng saiñ pyrthei, ïoh ba dang donkam shuh ïa kita ki stad aiñ ki ban nang pynshai shuh-shuh ïa kane ka kam kumno ban pynïaid ïa kata ka jingthung kam thung jam hapoh ka Jylla.”
Ha kawei ka liang, u State President ka NPP, Dr. W.R. Kharlukhi u la ong ba ka jingmih jyndat jong ka VPP na ka jingïalang ka dei ka ajenda politik kaba rieh jong ka seng.
“Ka dei ka ajenda politik kaba rieh jong ki ban ong ieid jaidbynriew…ong beit ba ngi kwah ïa kane ka mat ban ïaleh ilekshon District Council…ka dei kata,” u la ong.
