Shillong, Jymmang 19:
Ka 19 tarik Jymmang, 2023, kan long ka sngi ka ban sah kynmaw namar hadien bun snem, la sakhi biang ïa u paid byllien uba la wan najan bad najngai ban ïalum hajan ka Secretariat kaba dei ka shlem treikam ba heh duh jong ka sorkar ha ka jylla.
Ka jingwan jong ki paidbah kaba la kot sha ki phew hajar ngut ka long hadien ka jingkhot jong ka seng Voice of the People Party (VPP) ha ka sngi ba ka sorkar u Conrad K Sangma ka la pynlong ïa ka jingïalang bad baroh ki seng saiñpyrthei ban ïakren halor ka Roster System.
Hynrei ka VPP ka la dep kren shai naduh ba sdang ba ka sorkar ka dei ban pynsangeh shwa ïa baroh ka jingthung kam thung jam tat haduh ban da pynbeit thymmai shwa ïa ka Reservation Policy namar kane ka Policy bad ka Roster System ki don ka jingïadei.
Ha kane ka sngi, ki nongïalam ka seng VPP ki la mih jyndat na ka jingïalang kaba la long ha Secretariat namar ka sorkar ka khlem treh ban ïakren halor ka jingdonkam ban pynbeit thymmai ïa ka Reservation Policy.
Naduh ka por 11 baje mynstep, ki paidbah ki la wan na kylleng ki jaka sha ka jaka pynïeng kali hajan ka Additional Secretariat bad ki khlem ïa pra wat haba la wan u slap. Ki la ïa ap beit triang haduh ba ki nongïalam ka VPP ki la dep ban ai jingkren bad jingpynshai halor ka nongrim jong ka seng ha kaba ïadei bad ka Reservation Policy.
Ha kane ka sngi ka la don ruh ka jingrwai paidbah ïa ki jingrwai “Kynmaw Trai Ïa Ka Ri Khasi”, “Ri-Khasi Ri-Khasi”, bad ka jingrwai “Pynkhreh Samla”.
