Shillong, Jymmang 19:
U Bah Adelbert Nongrum uba dei u MLA ka Voice of the People Party (VPP) na North Shillong u la ong ba ka jingjia shah shoh jong ar ngut ki nongñiah kali kamai ha Khyndailad ha ka miet jong ka Sngi Palei ka long kaba lyngngoh namar ki pulit kiba don ha katei ka jaka kim lah ban kem ïa ki bar jylla kiba shoh ïa kitei ki samla Khasi.
Haba kren sha ki lad pathai khubor ha ka Sngi Thohdieng, u Bah Adelbert u la ong ba kam don kaei kaei ka bym lah, hynrei da ka jingïatreilang jong ka sorkar bad ka tnad pulit, lah ban kem ïa kiba donkti halor kane ka jingjia.
U Bah Adelbert u la ong ba kum kine ki jait jingjia kim dei shuh ban wan jia namar kan sa wanrah ïa ka jingsngew ïapher jaitbynriew, hynrei dei ban tem ïa kum kine ki jingjia.
Nalor kata, u la ong ba ka long kaba sngewlyngngoh bha ba ha ka por ba jia katei ka jingjia ha Khyndailad ba wat la ki pulit ki don ha katei ka jaka, hynrei ki khlem lah pat ban kem ïa kitei ki runar kiba la shoh bad mynsaw ïa kitei ar ngut ki samla Khasi.
“Nga ngeit skhem ba ka tnad pulit kan leh ïa kaba donkam bad ban tohkit khnang ban ïoh kem ïa ki briew kiba donkti ban pynmynsaw ïa uwei napdeng ki paradoh parasnam khamtam ba u dei u dkhot jong ka jaitbynriew,” la ong u Bah Adelbert.
Namar kata, u Bah Adelbert u la ong ruh ba kum u nongmihkhmat un shimkhia ha ka ban wanrah biang ïa ka shongsuk shongsaiñ bad u la ong ba kane ka jingjia ha kum kane ka por ba ka lyer jong ka VPP ka pynlong ïa ki jingïakhih ka dei ka rukom jong ka sorkar ban pynthut bad pynwit ïa ka jingmut jong ki paidbah. Ka jingshisha halor kata yn sa lap hadien namar katkum ki jingtip ba la ïoh lum na u MLA ka Mawryngkneng, u Bah Heavingstone Kharpran u la ong ba uwei na ki nongñiah kali kamai taksi uba la shah shoh bad mynsaw u dei ba shong ba sah ha Mawryngkneng.
