Shillong, Jymmang 19:
Ka Bharatiya Janata Party (BJP)-Meghalaya ka la kren shai ba ka seng ka sngewhun halor ka jingpyntreikam ïa ka ‘Roster System’ hapoh ka Jylla.
Haba kren sha ki lad pathai khubor ha ka Sngi Thohdieng, u nongïalam ka seng, Bah H.M. Shangpliang u la ong ba ka Sorkar ha ka jingïalang jong baroh ki seng saiñ pyrthei ka la batai bniah lyngba ka ‘presentation’ halor ka mat ba ïadei bad ka ‘Roster System’.
“Kane ka jingbatai ka long kaba la shai kdar bha bad ngi la sngewhun shisha ïa ka rukom pyntreikam ïa kane ka ‘Roster System’,” la ong u Bah Shangpliang.
Katkum katei ka jingbatai, u la ïathuh ba lyngba ka ‘Roster System’, ki Khasi-Jaiñtia, ki Garo, bad kita ki ‘Unreserved Category’, kin ïoh ïa la ka jong ka jong ka bynta.
“Lada ngi pynïaid ïa kane ka ‘Roster System’, kan don shisha kata ka jingïoh bynta kaba la phiah katkum ka ‘Reservation Policy’. Ka jingbatai mynta ka sngi kam shym la ïaid lait na ka ‘Reservation Policy’, hynrei ka dei halor ka ‘Reservation Policy’ ba ngi, ngin ïoh ïa ka bhah kaba 40%, ki Garo kin ïoh ka bhah kaba 40% bad kumta ter-ter,” u la ong.
Ha kajuh ka por, u la ïathuh ba ha kata ka ‘Roster System’, la mang ruh ïa ki briew kiba don jingduna ha ki dkhot met kumjuh ïa ki nongïalehkai kiba don ha ka Jylla.
“Lada ngi bud shisha ïa kata ka ‘Roster System’, kan long shisha kata kaba mano-mano ruh kin ym lah ban pynkylla da ka mon sngewbha jong ki lane ban pynrung kam ïano-re-ïano katkum ka mon sngewbha jong ki. Ki tnad treikam ka Sorkar ruh ki dei ban bud thik-pa-thik katkum kane ka ‘Roster System’,” u la ong.
Ka BJP ka ai jingmut ruh ïa ka Sorkar ba ka dei ban thaw ïa kawei ka komiti ka ban khmih, peit sani bad pynjanai ïa kino-kino ki jingwit khnang ba ka ‘Roster System’ kan long kaba paka bad ba ka bhah jong ki Khasi-Jaiñtia ne Garo kam dei ban duna bad kumta ter-ter.
Ha kawei ka liang, haba pynshai ba ka ‘Roster System’ kan ym treikam na bynta kito kiba leit ïa ki jingpule ba shajrong (Medical ne Engineering), u Bah Shangpliang u la ong, “Kane ka ‘Roster System’ kan dei thik tang ïa kito kiba wad kam.”
Haba kylli u la ong, “Na ka liang jong ngi, ngi sngewthuh ba kane ka ‘Roster System’ kan dei beit nangne shakhmat namar ïa ki briew ba la thung baroh shi katta, naduh u 1972, ïa kito kumno phin kynriah. Lada bakla ne dei ruh, phim lah ban ktah shuh ïa ki.”
Shuh shuh u la bynrap ba ki longshuwa-manshuwa naduh ba ïoh ïa ka Jylla lajong haba ki thaw ïa ka ‘Reservation Policy’ ki la da sngewthuh sani bha kaei kaba ki, ki donkam ban wanrah na bynta ka bha ka miat ha ka ïoh kam ïoh jam ki nongshong shnong Khasi-Jaiñtia kumjuh kiba sha Ri-lum Garo.
