Shillong, Jymmang 19:
U President ka Voice of the People Party (VPP), u Bah Ardent Miller Basaïawmoit, u la ong ba ka jingjia shah shoh jong ar ngut ki nongñiah kali kamai ha Khyndailad ha ka miet jong ka Sngi Palei ka long ban pynkhluit ïa u samla Khasi khnang ba un leit shoh noh ïa ki bar jylla.
“Ba un khluit noh u samla bad ba un leit ïashoh dkhar noh, hynrei sngewbha ngin ïa klet ïa kata ka shoh dkhar mynta, em ynnai ngop. Ngin ym ngop,” la ong u Bah Ardent ha ka jingïalang paidbah jong ka seng halor ka jingdawa ba ka sorkar ka dei ban pynsangeh shwa ïa ka jingpyntreikam ïa ka Roster System katba kam pat pynbeit ïa ka bhah thungkam thungjam kaba la long ha ka Parking Lot hajan ka Additional Secretariat ha ka Sngi Thohdieng.
U Bah Ardent u la ong ba ka jingïakhih jong ka VPP kam dei ban kren beiñ ne ban pynkha ïa ka jingsngew ïapher jaitbynriew hapdeng u Khasi-Jaiñtia bad Garo, hynrei ka jingïaleh jong ka seng ka long pyrshah ïa ka sorkar Meghalaya Democratic Alliance bad ïa ki seng saiñ pyrthei baroh kiba shu sngap mynthi.
“Ki MLA Khasi jong ngi ki la sdang ban kren ba u Garo un sa khih, kata ruh ka dei ka jingkynshoit ka jong ki. Ngin nym kren beiñ Garo na kane ka jingïalang ka jong ngi bad ngim pyrshah eiei ïa ki para Garo jong ngi, hynrei ka jingïaleh ka jong ngi ka long ïa ka sorkar MDA bad ïa ki seng riewlum baroh kiba mynjur,” la ong u Bah Ardent.
Shuh shuh u Bah Ardent u la kyntu ïa baroh ki MLA ka Khasi-Jaiñtia bad ïa baroh ki seng saiñ pyrthei ba lada ki don ka jingsngewlem na ka bynta ka hok jong ki khun samla ba kin iehnoh ïa ki seng jong ki ha kane ka por kaba mynta, hynrei ban ïatreilang ban wanrah ïa ka jingkyrmen.
“Wat ong ba ka jingieid ïa ka seng kan kham khraw ïa ka jingieid jong ka jaitbynriew. Kata ka dei ka kam shet kylla bad ka seng VPP ka buh ïa ka jaitbynriew hakhmat bad ka seng ka wan hadien”, la ong u Bah Ardent.
U Bah Ardent u la ong ba ka daw tynrai jong kane ka jingeh kaba la wanrah ka jingktah haba pyntreikam ïa ka Roster System ka dei ka bhah thungkam thungjam lane ka Reservation Policy.
Namar kata, u la kyntu ruh ïa baroh ki MLA Khasi-Jaiñtia bad ïa ki seng riewlum baroh ba kin pule bunsien ïa ka Reservation Policy ha shwa ba kin ïa mynjur ïa ka rai jong ka sorkar.
“Ngi la dep ban pule bunsien, bad ngi la lap ba kam don da kawei pat ka lynti lait da kaba pynbeit thymmai ïa ka Reservation Policy. Lada ka sorkar ka nud ban shim ïa ka sienjam ban pynbeit thymmai ka mut naduh mynta ka sngi yn sdang ban pyntreikam ïa kata ka ‘Policy’ thymmai kaba ïaid katkum ka jingdon paid bad ban pyntreikam ruh ïa kata ka Roster kaba ka ïingkashari ka la bthah bad kam don shuh kano kano ka jingktah ïa ki samla wad kam ki jong ngi,” la ong u Bah Ardent.
