Shillong, Jymmang 19:
U MLA barim ka Umroi konstitwensi, Bah George B. Lyngdoh uba mihkhmat ïa ka TMC u la pynpaw ba ka Sorkar Jylla ka dei ban pyntreikam beit ïa ka ‘Roster System’ nangne shakhmat bad ym dei shuh ban phaidien biang ïa kaba la dep naduh u snem 1972.
Haba ïakren bad u Bah Lyngdoh hadien ba la wai ka jingïalang jong baroh seng saiñ pyrthei ba la khot da ka Sorkar Jylla ha ka Sngi Thohdieng, u la ïathuh ba ka jingleit ka seng sha kane ka jingïalang ka long ban buh jingkylli ïa ka Sorkar bad ban ai jingmut ruh khnang ba kane ka ‘Roster System’ kam dei ban ktah ïa ki samla wad kam.
U la ïathuh ba baroh kiba wan ha kane ka jingïalang ki kwah ban pyntreikam beit nangne shakhmat ïa ka ‘Roster System’ namar lada phaidien biang ïa kiba la dep thung kam kin don shibun ki jyrwit-jyrwat.
Halor ki kam ba lait ha jaka jong u Garo ba la thung da u Khasi bad ha jaka jong u Khasi la thung da u Garo, kane kin ym ïakren shuh khnang ban ym pynwit shuh ïano-ïano.
Nalor kata, u la ong ba ka Sorkar ka la jubab halor ka jingkylli ka TMC namar ki don ki tnad kiba la long ba la pynkhreh ban pynrung kam noh, hynrei ki don ki tnad ki bym pat pynkhreh namar ki dang peit ïa ki kot ki sla.
Shuh shuh u la ong ba lada don ki tnad ki bym pat pynkhreh, kin pynkhreh noh bad lada don pat ki bym pat pynkhreh hynrei kiba la khot ban pynrung kam, ki dei ban pynsangeh noh khnang ban lait ka kynrum-kynram.
Ha kajuh ka por, ka seng ryngkat kiwei de ki seng saiñ pyrthei ki la ai jingmut ïa ka Sorkar ba kan thaw da ka komiti kaba kyrpang ba kan peit bniah biang sa shisien halor kane ka bynta.
Nalor kane, u la bynrap ba ka ‘Roster system’ kan ym treikam ha ka bhah leit pule, hynrei kan treikam beit tang ha ka bhah thung kam thung jam khnang ban ym pynkulmar ïa ki samla pule.
