Shillong, Jymmang 19:
U President ka Voice of the People Party (VPP), u Bah Ardent Miller Basaïawmoit u la pynbna paidbah ba un shong shah thngan marwei kaba khlem pud sngi hakhmat ka Secretariat ka ban sdang naduh ka 23 tarik Jymmang, 2023.
Kane ka jingshim rai jong utei u nongïalam ka VPP ka long hadien ba ka seng kam sngewhun ïa ka jingïakren ha ka jingïalang ba la pynlong da ka sorkar Meghalaya Democratic Party (MDA-2.0) ban ïakren halor ka Roster System kaba la long ha Sngi Thohdieng ha Secretariat. Ha kane ka jingïalang na ka liang ka sorkar kam shym la ïakren halor ka Reservation Policy bad kaba la pynlong ïa ki nongïalam jong ka VPP ban mih jyndat na katei ka jingïalang.
U Bah Ardent u la ong ba kum ki nongïalam jong ka seng ki la pynap lypa ïa kaei kaba kin leh bad kim lah ban shu sngap ba ka sorkar kan leh katba ka mon.
U la ong ba kum ka seng ka khlem leh kano kano ka ban pynduhnong ïa u paidbah, hynrei kum ki nongïalam, ki la shim ïa ka jingkitkhlieh ban ïalam bad ban shah shitom na ka bynta u paidbah.
“Ha kaba bteng ïa kane ka jingïakhih ka jong ngi, kum ka seng ka la rai ba u President jong ka seng marwei shwa un sdang ïa ka jingïakhih da kaba shah thngan hakhmat Secretariat ka ban sdang naduh ka 23 tarik Jymmang. Marwei ngan leit shong hangtei hakhmat Secretariat bad ka jingshah thngan kaba khlem buh por ngin sdang hangtei,” la ong u Bah Ardent.
U Bah Ardent u la ong ba ki paidbah ki lah ban ai jingkyrshan da kaba buh jingduwai bad ban ym ailad ba ka sorkar kan pynsniew ïa ka jingïakhih ka seng VPP da kaba pynmih ïa ki jingkulmar.
“Kam lei lei hynrei ngan shah thngan na ka bynta ka jong phi, ngan shah thngan na ka bynta ka lawei jong ki khun samla, ngan shah thngan na ka bynta ka burom jong ka jaitbynriew bad kata kan sdang naduh ka 23 tarik Jymmang,” la ong u Bah Ardent.
Une u MLA ka Nongkrem konstitwensi u la ong ba un shah thngan haduh ba ka sorkar kan hap ban jubab bad ban pynbeit ïa ka Reservation Policy.
“Kaei kaba ma phi ki paidbah ki lah ban leh katba ka jingshah thngan ka jong nga ka dang ïaid hangtei? Ki paidbah ha kylleng ki konstitwensi ka Khasi-Jaiñtia kim dei ban ai suk ïa kine ki MLA ba kin shongsuk hynrei ki dei ban tur bad ban leit ban pyrta ban shong kyllaiñ mungor hakhmat ïing jong kine ki MLA kiba kuman bad ki bym sngewthuh. Pyrkhat ban leit da ka lynti kaba jai jai ban pynrem jur ïa kine ki MLA kiba kam ba ki dei ki nongïalam jong phi, hynrei ki bym nud ban kren ïa kaei kaba ki dei ban kren,” la ong u Bah Ardent.
Hashwa ba un pynkut bad pynwai noh ïa katei ka jingïalang paidbah ha katei ka sngi, la sakhi ba u paid byllien uba la wan ban ai ka jingkyrshan ïa ka seng, ki la ïashim bynta lang bad u Bah Ardent ban ïa rwai da ka jingrwai ba la tip kum ka “Pynkhreh Samla” bad ka “Ri Khasi, Ri Khasi” bad sa kawei pat ka jingrwai kaba la tip kum ka “Kynmaw Trai Ïa Ka Ri Khasi”.
