Islamabad, Jymmang:
U Chief of Army Staff (COAS) jong ka Pakistan, u Asim Munir ha ka Sngi Balang u la ong ba ka tnat shipai kan nym ailad shuh ia ki jingjia thombor bad ki jingïakynad ba kin jia biang ha ki sngi ban wan kumba ka la dep jia ha ka 9 tarik u Jymmang.
Ha katei ka jingleit jurip jong u sha Sialkot Garrison, utei u heh shipai u la ong ba ka tnat shipai kan nym ailad shuh ïano ïano ruh ba kin leh bym suitñiew ne ba kin pynjah burom ia ki khlawait ka ri bad ia ki jingtei ba la buh khnang ban pynsah kynmaw ia ki. Namar ka jingdon jong kitei ki jingtei, ka long ban pynpaw ia ka dak ka jing-ai mynsiem bad ka jingsngew sarong bad kumjuh ruh ka jingkhlaiñ jong ka tnat shipai.
Katkum ka khubor na ka Inter- Services Public Relations (ISPR), la ong ba u COAS Asim Munir u la leit jurip sha Sialkot Garrison bad leit buh syntiew ha ki dur mot jong ki shipai ba la buh ban pynsah nam ha katei ka jaka, ha kaba la pyndon burom kyrpang ruh ia kito kiba la len lade naka bynta ka ri bad ka jaitbynriew ha kitei ki por ba la leit.
Kumta la ong ba ia kito kiba la khlad hapdeng ka jingïaleh naka bynta ka ri bad ka jaitbynriew, dei ban kynmaw ia ki ha ka kyrdan kaba halor duh, kum ka jingburom ia ka jinglen lade jongki naka bynta ka jaitbynriew.
Namar u la ong ruh ba ka State of Pakistan bad ki tnat shipai jong ka Pakistan, kin kynmaw burom bad ki ñiewkor ruh ia kito kiba la khlad bad len lade namar ka ri bad kumta ruh ka Pakistan kan kitkhia namar ka iing- ka sem jong kitei ki shipai kiba la khlad baroh bad yn kynmaw burom ia ka jingshlur bad jingtrei shitom jongki junom.
