Peshawar, Jymmang:
Ha kane ka khubor la ong ba uwei u briew u la khlad hashen bad 3 ngut kiwei pat ki la mynsaw hadien ba uwei u bom ba la pyndait ha ka ar shaka u la bthei ha katei ka jaka hapoh Peshawar, la iathuh ki pulit ha ka Sngi Palei.
La ong ba katei ka jingbthei ka la jia ha ka por ba ki dang pynbha bad shna ia katei ka thuk- thuk ha ka Sngi Balang. Ka Peshawar ka wan ba hynriew na ki nongbah ba heh tam jong ka Pakistan.
Haba ia dei bad kane ka jingjia ki pulit ki dang tohkit bad wad bniah ia katei ka jingbthei bad kumjuh ia kiba don kti ha katei ka kam thombor.
Katei ka jingjia ka long ruh hajan jong ka hotel kaba don ha Ring Road jong ka nongbah Peshawar.
Ki pulit ki la iathuh ruh ba uwei na kitei kiba mynsaw u dei u trai jong katei ka thuk-thuk bad napdeng jong kitei 3 ngut kiba mynsaw, uwei u dei uba la shah ktah bad mynsaw jur bha bad ka jingim jong u ka don hapdeng ka jingma.
Ki pulit ki la iathuh ba katei ka jingbthei ka long da ki tiar pynbthei Improvised Explosive Device (IED) kiba la don kumba 200 gram ka jingkhia.
